Tolyq emes otbasylar jalǵa alatyn baspana sýbsıdııalanýy múmkin

ASTANA. QazAqparat - «Otbasy bank» AQ basqarma tóraǵasy Lázzat Ibragımova tolyq emes otbasylardy baspanamen qamtamasyz etý jaıynda pikir bildirdi, dep habarlaıdy QazAqparat tilshisi.

«Tolyq emes otbasylardan ótinish kóp túsip jatyr. Ásirese, «Baqytty otbasy» baǵdarlamasy boıynsha resýrstardyń tapshy bolýyna oraı, bıyl bizge 51 mıllıard teńge bólindi. Bul qarajat shamamen 5 myńǵa jýyq otbasyǵa jetedi. Bul rette maýsym-shilde aılarynda 35 myń otbasy ótinish bildirgen», - dedi Lázzat Ibragımova Senattaǵy Úkimet saǵatynda.

Bul turǵyda bank tolyq emes otbasylarǵa jalǵa beriletin turǵyn úıdi sýbsıdııalaý usynysy týraly aıtty.

«Jalǵa alý tólemderin sýbsıdııalaý túrinde kómek alýǵa quqyǵy bar sanattardyń tizbesin «tolyq emes otbasylar» sanatymen tolyqtyrý usynyldy», - dedi «Otbasy banki» basshysy.

Onyń aıtýynsha, baǵdarlamaǵa tabysy joǵary adamdar qatysa almaıdy.

«Bul qadam halyqtyń osy sanatyndaǵylar arasynda áleýmettik shıelenisti tómendetedi. Sebebi olar «Baqytty otbasy» baǵdarlamasynan shyǵarylǵanyna áli de narazylyq bildirip jatyr. Degenmen bul sanattaǵy adamdar «Shańyraq» baǵdarlamasy aıasynda qamtylyp otyr jáne 5 paıyzben nesıe ala alady», - dedi Lázzat Ibragımova

Budan buryn habarlanǵandaı, senator Serik Shaıdarov tolyq emes otbasy sanatyndaǵylarǵa baspana berý máselesin kóterdi.