Tolyq emes kópbalaly otbasylarǵa úıden jumys isteýge múmkinshilik jasaý qajet - Elbasy

ASTANA. QazAqparat - Tolyq emes kópbalaly otbasylarǵa úıden jumys isteýge múmkinshilik jasaý qajet. Bul týraly búgin "Nur Otan" partııasynyń kezekti XVIII sezinde Elbasy Nursultan Nazarbaev aıtty, dep habarlaıdy QazAqparat tilshisi.

"Tolyq emes kópbalaly otbasylarǵa úıden jumys isteýge múmkinshilik jasaý qajet. Al aýyldaǵy kópbalaly otbasylarǵa jekelegen granttar, kvotalar jáne shaǵyn nesıeler bólý qajet. Osy baǵytta jumys isteý kerek. Úkimet pen ákimder bul qyzmetti "Nur Otan" jáne "Atamekenmen" birge júzege asyrýy tıis", - dedi Elbasy.

Memleket basshysy barlyq ákimder muqtaj otbasylarǵa kómek kórsetýdiń óńirlik baǵdarlamasyn partııalyq "Baqytty otbasy" jobasyna sáıkes qaıta qarastyrý kerektigin eskertti.

"Ol elimizdegi otbasy ınstıtýtyn júıeli qoldaýǵa baǵyttalǵan", - dedi Nursultan Nazarbaev.