Tóleýtaı Raqymbekov shtaby Oralda jastar forýmyn ótkizdi
15:17, 01 Maýsym 2019
ORAL. QazAqparat - «Aýyl» partııasy atynan prezıdenttikke kandıdat Tóleýtaı Raqymbekovtyń óńirlik shtaby Oralda arnaıy forým uıymdastyrdy. Bul týraly partııanyń baspasóz qyzmeti málim etti.
«Jastar aýyldy qoldaıdy» degen atpen ótken is-sharada qazirgi jastar máselesi, onyń ishinde jumyssyzdyqpen kúres, baspanamen qamtý jáne ulttyq qundylyqtardy saqtaý tóńireginde sóz boldy.
Spıkerler Tóleýtaı Raqymbekovtiń baǵdarlamasynda aýyl jastaryna jaǵdaı jasaý jóninde jan-jaqty qamtylǵanyn sóz etip, ýrbanızatsııanyń saldary shaǵyn eldimekenderdiń joıylýyna ákelýi múmkin ekenin aıtty.
Jıynda buǵan qosa Tóleýtaı Raqymbekovtiń saılaýaldy tuǵyrnamasynda aıtylǵan otbasylyq qundylyqtardy saqtaý jaıy da qyzý talqylandy. Qazirgi jahandaný dáýirinde onyń mańyzy zor ekenin atap ótti jınalǵandar.