Tóleýtaı Raqymbekov Mańǵystaý jurtshylyǵyna saılaýaldy baǵdarlamasyn tanystyrdy

NUR-SULTAN. QazAqparat - «Aýyl» partııasy atynan prezıdenttikke kandıdat Tóleýtaı Raqymbekov Mańǵystaý jurtshylyǵyna saılaýaldy baǵdarlamasyn tanystyrdy, dep habarlaıdy partııanyń baspasóz qyzmeti.

Prezıdenttikke úmitker jergilikti turǵyndarmen kezdesý barysynda aımaqqa tán máselelerdi kóterip, ony sheshý joldaryn usyndy. Ol Mańǵystaý óńirine kúndelikti tutynatyn azyq-túliktiń basym bóligi basqa aımaqtardan ákelinetinin sóz etip, bul máseleni sheshý úshin aýyl-aımaqta jylyjaıdy kóbeıtý kerektigin alǵa tartty. Buǵan qosa, shubat óndirisin jolǵa qoıyp, tabys kólemin eselep arttyrýǵa bolatynyn aıtty. Óıtkeni, osy tektes bastamalarǵa qazir memleketten jaqsy qoldaý bar.

Jıynda sonymen qatar jumyssyzdyq, aýyl sharýashylyǵyn jandyrý, baspanamen qamtý, ınfraqurylymdy damytý jáne jastar saıasaty sekildi problemalar kóterilip, keńinen talqylandy.