Tóleýtaı Raqymbekov Almaty oblysynda jergilikti sharýalarmen kezdesti

TALDYQORǴAN. QazAqparat - «Aýyl» partııasynan prezıdenttikke kandıdat Tóleýtaı Raqymbekov Almaty oblysyna sapary barysynda jergilikti mamandarmen birqatar máseleni talqylady. Sondaı-aq, úmitker Almaty oblysyndaǵy jýyrda ashylǵan agropark pen salaǵa qyzmet etetin avıatsııa ókilderimen kezdesti. Bul jóninde partııanyń baspasóz qyzmeti habarlady.

2008 jyly Qarasaı aýdany Kóldi aýylynda elimizdegi eń alǵashqy aýyl sharýashylyǵy boıynsha bilim taratý ortalyǵy ashylǵan bolatyn. Sodan beri jergilikti sharýalar salaǵa qatysty bastamalarymen osynda tanysady. Keıin iske asyryp, ónimin eselegender de bar. Keıde kerisinshe sharýalar óz máselesin aıtyp, mamandar onyń sheshimin izdep jatady.

Tóleýtaı Raqymbekov osyndaı mekemelerdi elimizdiń barlyq aýdan ortalyǵynda ashý kerektigin aıtty.

Al, «Ońtústik» agroparki ótken jyly ǵana jumysyn bastady. Ol aldyńǵy bilim taratý ortalyǵynyń tájirıbe alańy deýge bolady. Arnaıy aýmaqqa otandyq mamandar oılap tapqan ondaǵan tuqym egilip, nátıjesi sharýalarǵa tanystyrylyp jatyr. Prezıdentikke úmitker Tóleýtaı Raqymbekovtyń aıtýynsha, osyndaı keshendi sharalar arqyly ǵana salanyń damýyna tyń serpin berip, álemdegi agrarly eldermen básekelese alamyz.

Buǵan qosa, úmitker avıatsııanyń saladaǵy mańyzy týraly aıtyp berdi. Ásirese, myńdaǵan gektar aýmaqty baqylaýda ustap, qajetti sharalar qoldaný úshin osyndaı tehnıka, al, shaǵyn egis alqaptaryna drondy paıdalaný qajet. Jalpy zamanýı jabdyqtardan qashpaý kerek. Ony qoldanǵannan sharýanyń utary kóp ekenin alǵa tartty.