Tóleýtaı Rahymbekov: Prezıdent úndeýi – bılik pen azamattar arasyndaǵy senimdi ózara qarym-qatynastyń bastaýy
«Qazir ǵana el Prezıdenti Qasym-Jomart Toqaevtyń koronavırýs máselesine qatysty úndeýin tyńdadym. Jaǵdaıdy ádil, ashyq saraptaý boldy. Menińshe, qazaqstandyqtar mundaı áńgimeni baıaǵydan beri kútti. Aýyrǵandardy emdeýge qatysty jaǵdaı, dári-dármekpen qamtamasyz etý, saıası ósek-aıań - munyń barlyǵyn Prezıdent qozǵady. Týǵan-týystary men jaqyndarynan aıyrylǵan qazaqstandyqtar bıliktiń qarym-qatynasyn baıaǵydan beri kútken edi. Jáne de Prezıdent óz atynan kóńil aıtty», - dep jazdy ol Facebook paraqshasynda.
Sonymen qatar Tóleýtaı Rahymbekov koronavırýs indetinen qaza tapqandardy eske úshin 13 shilde kúnin Ulttyq aza tutý kúni dep jarııalaý da durys ári der ýaqytynda qabyldanǵan sheshim bolǵanyn aıtady.
«Memleket basshysy bılik organdarynyń qatelikteri men múlt ketkenin moıyndady. Onyń daýysynan búgingi kúnge degen alańdaýshylyq baıqalyp turdy. Degenmen vırýsty jeńetindigimizge degen nyq senim boldy. Prezıdent úndeýi bılik pen azamattar arasyndaǵy jańa, úmittendiretin, demek, senimdi ózara qarym-qatynastyń bastaýy ǵana ekendigine senimdimin», - dedi ortalyq basshysy.
Aıta keteıik, QR Prezıdenti Qasym-Jomart Toqaev respýblıkalyq telearnalar arqyly elimizde qalyptasqan ahýalǵa baılanysty úndeý jasap, onda 13 shilde kúni Ulttyq aza tutý kúni dep jarııalanatyndyǵyn aıtqan edi.