Tóleýtaı Rahymbekov otandyq agrarlyq ǵylymnyń negizgi problemasyn aıtty
«Biz saladaǵy jaǵdaıǵa uzaq taldaý jasap, agrarlyq turǵyda úzdik sanalatyn Argentına, Brazılııa, Frantsııa, Germanııa elderimen salystyrý jumystaryn júrgizdik. Osy oraıda Qazaqstannyń agrarlyq ǵylymynyń basty problemasy bilimdi jetkizý, tehnologııa transferti men kommertsııalandyrýda uıymdastyrý sharalarynyń jetkiliksizdigine baılanysty degen uıǵarymǵa keldik», - dedi T. Rahymbekov AÓK salasynda ǵylymı jetistikterdi kommertsııalandyrý taqyrybyndaǵy onlaın konferentsııada.
Osy oraıda ol elimizde keıbir protsester kerisinshe júrgizilip jatqanyn atap ótti.
«Bizde 23 ǵylymı-zertteý ınstıtýty, 14 tájirıbelik stantsııa bar. Argentınada 4 ǵylymı-zertteý ınstıtýty, 4 ǵylymı-tájirıbelik stansa men 320 bilimdi taratý ortalyǵy jasaqtalǵan. Bizdiń baǵalaý boıynsha Qazaqstanda bilimdi jetkizip, taratatyn kem degende 200-210 ortalyq kerek. Bul degenimiz, 163-i aýyldyq aýdan, 40-y oblys deńgeıinde, sondaı-aq qosymsha úsheýi negizgi ortalyq dárejesinde 3 ýnıversıtettiń bazasynda», - dedi T. Rahymbekov.
Budan buryn habarlanǵandaı, Tóleýtaı Rahymbekov agrarlyq salada ǵalymdar óziniń ǵylymı jumystaryna syıaqy alýy kerektigin atap ótti.
«Kommertsııalandyrý – bul termın qazirgi kezde bizdiń qoǵamdyq ómirimizde óziniń naqty ornyn alyp otyr. Kommertsııalandyrýdyń qajet ekenine daý joq, alaıda sózden iske kóshý úshin biraz sharýany eńserý kerek. Kommertsııalandyrýdyń ishindegi eń basty tetikteriniń biri – ol «roıaltı júıesi», - dedi ol.