Tóleýtaı Rahymbekov Qasym-Jomart Toqaevty jeńisimen quttyqtady
«Sáýir aıynda partııalastarym meni kandıdat retinde biraýyzdan usyndy. Sodan beri jer-jerde barlyq ujym tynym kórmeı úgit júrgizdi. Óńirlerdi aralaý barysynda belsendi azamattarǵa alǵysymdy aıtyp otyrdym. Osy saılaý naýqanyna bir kisideı atsalysqan barlyq jaqtastaryma alǵys aıtqym keledi», - deıdi Tóleýtaı Rahymbekov.
«Aýyl» partııasynyń ókili «exit poll» nátıjesine qarap qorytyndy jasaýǵa bolmaıtynyn aıtady.
«Munymen ýaqyt toqtap qalǵan joq. Bizdiń partııanyń saıası paltformasy túgeldeı aýyldyq eldi mekenderdi gúldendirýge baǵyttalǵan. Al bul - ómirsheń baǵyt. Alda Parlament saılaýlary bar. Sonyń bárinde osy ustanǵan baǵytymyzdan taımaımyz», - dedi ol.
Kandıdattyń aıtýynsha, saılaýǵa daıyndyq retinde berilgen 2 aı partııanyń jumyla jumys isteýine tolyqtaı jetkilikti bolǵan.
«Bizdiń partııa - zamanaýı tıptegi partııa. Sondyqtan 2 aı ýaqyt bizge azdyq etken joq. Keıbir ujymdar bolýy múmkin, olarǵa bir jyl ýaqyt berseńiz de úlgermeı jatady. Sondyqtan bul saılaýǵa barynsha daıyndyqpen keldik dep aıtýǵa bolady», - dedi partııa ókili. Sonymen qatar, Tóleýtaı Rahymbekov jeńiske jetken kandıdat Qasym-Jomart Toqaevty quttyqtap, onyń aldaǵy jumysyna sáttilik tiledi.
Eske salaıyq, «Aýyl» partııasynyń ujymy ózderi usynǵan kandıdat Tóleýtaı Rahymbekovpen birge teledıdar arqyly «exit poll» nátıjeleriniń qorytyndysyn tyńdady.
Osydan keıin kandıdat QazAqparat tilshisine saılaýdyń aldyn ala nátıjeleri týraly óz pikirin bildirgen bolatyn. Ol áýeli bul saılaýǵa partııalastarynyń arqasynda tyńǵylyqty daıyndyqpen kelgenin eske aldy.