Tólen Ábdik ál-Farabıge elordada eskertkish ornatýdy usyndy

NUR-SULTAN. QazAqparat – QR Memlekettik syılyǵynyń ıegeri, jazýshy Tólen Ábdik Ábý Nasyr ál-Farabıge elordada eskertkish ornatýdy usyndy, dep habarlaıdy QazAqparat tilshisi.

«Ábý Nasyr ál-Farabı – Arıstotelden keıin ekinshi ustaz atanǵan adamzat tarıhyndaǵy eń ǵulama adamdardyń biri. Onymen qalaı maqtansaq ta artyq bolmaıdy. Sondyqtan, meniń usynysym: osy mereıtoı qarsańynda ál-Farabıdiń eskertkishin osy elordada ornatýǵa bolady. Shetelden kelgender eskertkishke qarap, ony birden tanıtyn edi. Ekinshiden, ál-Farabıdiń mereıtoıyn ıÝNESKO-men qosylyp ótkizýge bolady», - dedi Tólen Ábdik Aqordada «Rýhanı jańǵyrý» baǵdarlamasyn iske asyrý jónindegi Ulttyq komıssııa otyrysynda.

Óz kezeginde Memlekettik hatshy Qyrymbek Kósherbaev Ábý Nasyr ál-Farabıdiń 1150 jyldyǵy ıÝNESKO-nyń kúntizbesine kirgenin atap ótti.

«Parıjde ıÝNESKO-nyń bas dırektorymen kezdesip, osy máseleniń bárin naqtyladyq. Abaıdyń da, Ábý Nasyr ál-Farabıdiń da mereıtoıy, Shymkent qalasynyń 2200 jyldyǵy – bári ıÝNESKO-nyń qoldaýy aıasynda ótedi», - dedi ol.

Eske sala ketsek, Memlekettik hatshy Qyrymbek Kósherbaevtyń tóraǵalymen Aqordada búgin QR Prezıdenti janyndaǵy Qoǵamdyq sanany jańǵyrtý baǵdarlamasyn iske asyrý jónindegi ulttyq komıssııanyń otyrysy ótkizildi.