Tólegen Qunádilov: Sheneýnikter, ákimder halyqpen únemi keri baılanysta bolýy kerek
«QR Prezıdenti Qasym-Jomart Toqaev Parlament Májilisiniń jalpy otyrysynda negizgi reformaǵa toqtaldy. Jaqynda halyq arasynda qyzý talqyǵa túsken ýtıldik alym jınaýǵa qatysty máseleni qarady. Kásipodaq qyzmetkerleri retinde Memleket basshysynyń halyqtyń tabysyn arttyrýǵa baǵyttalǵan barlyq quraldar men tetikterdi qarastyratyn áleýmettik kodeksti ázirleý men qabyldaý týraly tapsyrmasy biz úshin mańyzdy boldy. Sonymen qatar, ol jumyssyzdyq deńgeıin tómendetý týraly aıtty. Ásirese jastar arasynda. Biz seriktestik tarap retinde óz kezegimizde áleýmettik kodekske sáıkes júzege asyrý tetikterin jetildirý boıynsha birqatar usynystar daıyndadyq jáne áli de usynýǵa daıynbyz», - dedi Tólegen Qunádilov.
Sonymen qatar, spıker jastar tájirıbesine toqtaldy.
«Joǵary oqý ornyn nemese orta arnaýly oqý oryndaryn bitirgen jastarda jumysqa ornalasý máselesi jıi týyndaıdy. Memlekettik «Jastar tájirıbesi» baǵdarlamasy bul problemany sheshýge aıtarlyqtaı kómek boldy. Desek te, ol jetkiliksiz, jalaqy deńgeıi de sáıkes kelmedi. Búgin Prezıdent jastar tájirıbesine grant bólý kerektigin aıtty. Bul - jumys isteıtin jastar úshin tamasha múmkindik jáne áleýmettik lıft», - dep qosty ol.
Tólegen Qunádilov Qasym-Jomart Toqaevtyń memlekettik organ basshylary óńirlerge turaqty túrde shyǵyp, oblys ákimderi ár eldi mekenniń turǵyndarymen turaqty túrde kezdesýler ótkizip turýy kerek degen bastamasyn qoldady.
«Sheneýnikter, ákimder halyqpen únemi keri baılanys jasap, halyqqa shyǵyp, olarmen tildesýleri kerek. Memlekettik saıasatty, usynystardy jetkizýleri tıis dep oılaımyn. Bul bolashaqta búkil halyqtyń ómir súrý sapasy men ál-aýqatyn jaqsartady», - dedi ol.