Tólebı aýdanyndaǵy 9 eldi mekenge tabıǵı gaz berile bastady

TÓLEBI. QazAqparat – Búgin Túrkistan oblysy, Tólebı aýdanyndaǵy 9 eldi mekenge tabıǵı gaz berile bastady. Túrkistan oblysy ákiminiń orynbasary Meıirjan Myrzalıev pen aýdan ákimi Baýyrjan Omarbekov osy ońdy oqıǵaǵa baılanysty ótken jıynǵa qatysyp, turǵyndardyń qýanyshyna ortaqtasty, dep habarlaıdy QazAqparat tilshisi.

Saltanatty jıynda aýdan basshysy jınalǵan jurtshylyq aldynda quttyqtaý sóz sóılep, ózge eldi mekenderge de gaz jetkizý máseleleri qaralyp jatqanyn atap ótti. Ákimniń sózinshe, 2017-2019 jyldar aralyǵynda respýblıkalyq bıýdjet esebinen 1mlrd 988 mln teńgege Tasaryq aýyldyq okrýgindegi Tasaryq, Jambyl, Hanaryq, Ońtústik jáne Qaratóbe aýyldyq okrýgindegi Maıbulaq, Qostóbe, Qaratóbe, Baldyberek, Tóńkeris eldi mekenderine gaz qubyrynyń qurylysy júrgizilgen bolatyn. Qazirgi tańda 9 nysandy syǵymdaý aktilerimen oryndaýshy tehnıkalyq qujattary rásimdelgen.

Búginde 9 eldi meken boıynsha 1542 abonenttiń 793 abonentine tehnıkalyq sharttar alynyp, ishki gaz qubyrlary júrgizildi. Sondaı-aq «QazTransGazAımaq» AQ-na tirkelgen. Búgin paıdalanýǵa berilgen gaz júıesin qosqanda, aýdan kólemindegi 55 eldi mekenniń 48-i tabıǵı gaz júıesimen qamtylmaq.

«Aýdanda Qoǵaly aýyldyq okrýginiń Dıhankól, Uzynaryq, Alshaly jáne Qasqasý aýyldyq okrýginiń Qasqasý, Joǵary Qasqasý, Keńesaryq, Keregetas eldi mekenderin tabıǵı gazben qamtamasyz etý úshin jobalaý-smetalyq qujattamasy ázirlenip, saraptamanyń oń qorytyndysy alyndy. Smetalyq quny 1,269 mlrd teńgeni quraıdy. Jobany qarjylandyrý úshin 2020 jylǵa arnalǵan respýblıkalyq jáne oblystyq bıýdjetke usynylyp, qarjylandyrý kútilýde. Joba qanaǵattandyrylǵan jaǵdaıda Tólebı aýdanynyń 55 eldi mekeniniń 118 600 turǵyny 100% tabıǵı gazben qamtamasyz etiletin bolady»,- deıdi aýdannyń gazǵa jaýapty mamandary.