Tólebı aýdanynda joldar jóndelip, kósheler abattandyrylady
Ákimdiktiń habarlaýynsha, aýdan ortalyǵy Leńgir qalasynda kólik joldaryn jóndeý men abattandyrý jumysy qarqyn alǵan. Bul maqsatta respýblıkalyq, oblystyq jáne aýdandyq bıýdjetten tıisti qarajat bólingen.
Qazir qalany qaıta jańǵyrtý boıynsha birshama ister atqarylyp, uzyndyǵy 3,3 shaqyrymdy quraıtyn Á.Bektaev kóshesin jóndeý jumystary bastalyp ketken. Jolaıaqtar salynyp, kóshe boıy 10 metrge keńeıtilip jatyr. Óz kezeginde abattandyrý, asfalt tóselip, jaryq baǵanalary da qoıylady dep kútilýde. Asfalt tóseý jumystaryna respýblıkalyq jáne oblystyq bıýdjetten 126 mln teńge qarjy bólinip otyr. Osyndaı jumystar qala kelbetiniń ajarlanýyna óz septigin tıgizetini sózsiz.
Biraz ýaqyttan keıin aýdan turǵyndary men qonaqtary tegis jolmen júretin bolady. Budan ózge, aýdan aýmaǵyndaǵy joldardy jóndeý, eldi mekenderdi aýyz sýmen, kógildir otynmen qamtamasyz etý, mektepterdi, emdeý oryndaryn jańalaý syndy qajettilikter kezeń-kezeńimen rettelýde.
Mundaı jumystar aýdan turǵyndary men qonaqtarynyń jaılylyǵyn arttyrý maqsatynda edáýir aýqymda júrgizilip jatyr.
Qazirgi tańda Leńgir qalasyndaǵy Tólebı kóshesiniń 6 shaqyrym jolynyń jóndeý jumystary bastaldy. Oǵan respýblıkalyq jáne oblystyq bıýdjetten 230 mln teńge qaralǵan. Endigi kezekte qala kóshelerin jóndeý men abattandyrý jumystarymen qosa aıaldamalar, sýaǵarlar jańartylyp, jaıaý júrginshilerdiń qaýipsizdigi úshin aıaq joldary keńeıtilip, jasyl jelekter molaıady.
Aýdan ortalyǵyn abattandyrý men kórkeıtý jumystary munymen shektelmeıdi. Alda atqarylatyn jumystar óz kezegimen jalǵasyn tabady deıdi ákimdik qyzmetkerleri.