Tólebı aýdanynda kúrdi mádenı ortalyǵynyń mereı toıy men Rýhanı kelisim kúni atalyp ótti

TÓLEBI. QazAqparat – Túrkistan oblysy, Tólebı aýdanynda kúrdi mádenı ortalyǵynyń 10 jyldyq mereı toıy men Rýhanı kelisim kúnine oraı merekelik kesh ótti. Aıtýly sharada ártúrli baǵdarlamalar uıymdastyrylyp, ortalyqtyń qyz-jigitteri qonaqtarǵa arnap kontserttik baǵdarlama usyndy, dep habarlaıdy QazAqparat tilshisi.

Sharaǵa oblystyq Assambleıa tóraǵasynyń orynbasary-hatshylyq meńgerýshisi Ǵanı Rysbekov pen Tólebı aýdany ákiminiń orynbasary Serjan Dúısebaev, aýdandyq ardagerler keńesiniń tóraǵasy Átirhan Shyńǵysbaev pen aýdandyq etno-mádenı qoǵamdyq uıymdarynyń basshylary qatysty. Merekelik keshke kelgen qonaqtar etnomádenı birlestiktiń barsha ókilderin mereıtoılarymen quttyqtap, izgi tilekterin jetkizdi. Kesh barysynda aýdannyń qoǵamdyq ómirine belsene aralasyp, halyqtar arasyndaǵy yntymaqty nyǵaıtýǵa atsalysyp júrgen birqatar ortalyqtyń ókilderi marapattaldy. Birliktin saqtalýyna kúsh-jigerin jumsap júrgen azamattarǵa Túrkistan oblystyq Qazaqstan halqy Assambleıasynyń jáne aýdan ákiminiń alǵys hattary tabystaldy.

Aıta keteıik, 2009 jyly Tólebı aýdanynda Qazaqstannyń kúrdter qaýymdastyǵynyń bólimshesi tirkelgen. Taýly óńirde búginde 1400-den astam kúrdi ultynyń ókili tatý-tátti ómir súrýde.