Tólebı aýdanynda demeýshiler kóp balaly, jalǵyzbasty anaǵa úı salyp berdi
Quny 12 mln teńgelik úıdiń kólemi 120 sharshy metrdi quraıdy. Segiz balaly ananyń jaı-kúıimen tanysqan aýdandyq «Jastar resýrstyq ortalyǵynyń» qyzmetkerleri qurylys jumystaryn uıymdastyryp, demeýshiler izdep, izgi istiń basy-qasynda júrdi. Turǵyn úı zamanaýı úlgide tolyq árlengen.
Kópbalaly ananyń qýanyshymen bólisýge aýdan ákimi Tólegen Telǵaraev arnaıy baryp, demeýshilik jasaǵan azamattarǵa alǵysyn jetkizdi.
– Bul jumystar Elbasymyz Nursultan Nazarbaevtyń «Bolashaqqa baǵdar: rýhanı jańǵyrý» maqalasyn iske asyrý maqsatynda ári azamattardyń boıynda otanǵa degen jaýapkershilik sezimin jáne áleýmettik belsendiligin arttyrý úshin uıymdastyrylyp otyr. Elimizde jylaǵandy jubatatyn, súringenge qol ushyn beretin jany jomart, qaıyrymdy azamattarymyzdyń osyndaı saýapty isteri kóp bola bersin, – degen aýdan basshysy qýanysh ıelerine gaz plıtasyn tartý etti.
Jastardyń ıgi bastamasyna aýdandyq ardagerler keńesiniń tóraǵasy Átirhan Shyńǵysbaev alǵysyn aıtyp, batasyn berdi. Qonys toı ıesi Madına Nabıeva baspana salyp bergen demeýshilerge rızashylyǵyn bildirdi.
Aıta keterligi, Madınanyń ómirlik jary ómirden ótken soń segiz balany jalǵyz ózi tárbıeleýde. Kópbalaly ana osy ýaqytqa deıin aýyldaǵy tozyǵy jetken úıdi panalap kelgen bolatyn.