Toqyma toqyǵannan góri shahtaǵa túskenim artyq - Qaraǵandydaǵy kenshi qyz

QARAǴANDY. QazAqparat - Qaraǵandydaǵy Kostenko atyndaǵy shahtada 1300 kenshiniń arasynda tek 2 áıel qyzmet etedi. Solardyń biri Zarına Álpıeva - jerasty sheberi.

Álpıevter áýletinde kenshi mamandyǵy atadan balaǵa aýysyp keledi. Atasy men ákesiniń jolyn endi Zarına qýyp keledi. Boıjetkenniń atasy ken qazýshy bolǵan. Al ákesi Ahmetjan Álpıev 40 jylǵa jýyq eńbek ótili bar shahter. Qazir ol eki ulymen birge Saran shahtasynda jumys isteıdi. Onyń taý-ken isine degen qushtarlyǵy qyzyna da berilgen.

«Buryn ákem men aǵalarym kelip shahta týraly aıtyp jatqanda, kómir qalaı óndiriletinin, kenshiler ne isteıtinin bilgim keletin. Sodan keıin men taý-ken mamandyǵy boıynsha oqýǵa tústim. Oqýymdy támamdaǵan soń tájirıbeden ótip, shahtada jumys istegim keledi dep sheshtim», - deıdi Zarına.

Zarınanyń jumystaǵy tabandylyǵy men shydamdylyǵy, tipti tájirıbeli kenshilerdi de tań qaldyrady.

Boıjetken aptasyna úsh ret tórt saǵatqa 800 metr jer astyna túsedi.

Kileń er jumyskerlerden quralǵan ujymda Zarına - qarańǵy shahtaǵa kúlkisimen jaryq syılaıtyn jalǵyz názik jandy.

«Meniń jumystaǵy mindetim - shahtaǵa túskende kómirdiń qalaı óndiriletinin baqylaý. Biz qabattardan, paıdalaný ýchaskelerine synamalar alamyz, sodan keıin olardy zerthanaǵa jiberemiz», - deıdi kenshi boıjetken.

Zarınanyń pikirinshe, mundaı jumys qaýipti emes, tek muqııattylyq pen úlken dáldikti qajet etedi. Degenmen qyzdyń anasy jalǵyz qyzy úshin árdaıym alańdaıdy. Al ákesi qyzynyń jumysyn maqtan tutady.

«Bizde shahtada balalarymyzdy óndirispen tanystyrý úshin jumysqa alyp keletin bir dástúr bar. Men qyzymnan mundaı mamandyqty qalaısyń ba dep suradym. Ol birden kelisti. Shahtany aralaý kúni jumysyma kelgende, birden shahter bolatynyn aıtty. Men onyń shahtaǵa túskeninen qoryqpaımyn, óıtkeni ol tehnıkany óte jaqsy biledi. Men oǵan árqashan rızamyn», - deıdi Zarınanyń ákesi Ahmetjan Álpıev.

Zarınanyń jumysyna áriptesteri de dán rıza. 3 jyl jumys ishinde ol ózin tapsyrmalardy sapaly jáne kidirissiz oryndaıtyn jaýapty qyzmetker retinde kórsete bilgen.

«Men qyzdar sııaqty toqyma toqyp, kıim tikkendi unatpaımyn. Odan da shahtaǵa túsip, jumys istegenim artyq», - deıdi Zarına.