Toqtar Bolysov: Jerimiz – ata-babamyzdyń qanymen kelgen teńdessiz baılyǵymyz

NUR-SULTAN. QazAqparat – Qazaqstan jastary kongresiniń atqarýshy dırektory Toqtar Bolysov Prezıdent «Táýelsizdik bárinen qymbat» atty maqalasyn qatysty pikirin áleýmettik jelige jarııalady. Onyń aıtýynsha, jastar jat pikirlerdiń jeteginde ketpeýi kerek, dep habarlaıdy QazAqparat tilshisi.

«Prezıdent maqalasyna negiz bolǵan ıdeıamen men de kelisemin. Bizge jerdi eshkim syıǵa bermedi. Ol taǵdyrdyń da, kórshiles memleketterdiń de tartýy emes, ata-babamyzdyń qanymen, terimen, jasymen kelgen teńdesiz baılyq. Qazir Qazaqstannyń jeri ulan-ǵaıyr, baıtaq deıdi. Alaıda sol baılyqtyń ózi ǵasyrǵa jalǵasqan talaı kúrestiń jemisi», - dedi Toqtar Bolysov QazAqparat tilshisine.

Onyń aıtýynsha keıingi kezde aqparattyq portaldardaǵy jańalyqtardyń bir bóligi qazaqtyń jerine qatysty jónsiz pikirge tolyp ketken.

«Degenmen sondaı jat pikirlerdiń jeteginde ketý Qazaqstannyń kózi ashyq, kókiregi oıaý jastaryna tán emes. Biz Táýelsiz Qazaqstannyń jastary retinde tarıh pen saıasatty bólek qarastyra alamyz. Tarıh bizge málim. Ony XXI ǵasyrda eshkim ózgerte almaıdy. Al biz jastar retinde azamattyq pozıtsııamyzdy bildirip, qoǵamdyq is-sharalarda belsendilik tanyta beremiz. Ár maman óz salasyna eńbegin sińirse ǵana bundaı jaıttar oryn almaıdy. Tarıhty halyq bastan ótkerse, ony jazatyn tarıhshylar. Al saıasatqa aralasam degender saıası reformalarǵa jáne osy shaqqa jaýapty. Ótken shaq týraly tarıhshylar sóz qozǵasa durys bolady», - dedi ol

Eske sala keteıik, búgin Qazaqstan Prezıdenti Qasym-Jomart Toqaevtyń «Táýelsizdik bárinen qymbat» atty maqalasy jarııalanǵan bolatyn.