Tokıoǵa qýatty taıfýn kele jatyr, Olımpıada oıyndarynyń bir bóligi keıinge qaldyryldy

TOKIO. QazAqparat – Jazǵy Olımpıada oıyndarynyń astanasy – Tokıoǵa qýatty taıfýn kele jatyr, sonyń saldarynan esý jarysy keıinge qaldyryldy, dep habarlaıdy QazAqparat Kyodo-ǵa silteme jasap.

«Nepartak» taıfýny seısenbide (27 shilde) Tynyq muhıtynan Japonııanyń shyǵysy men soltústik-shyǵysyna jaqyndaıdy. Olımpıada oıyndary ótetin Tokıony qosa alǵanda, eldiń birqatar aımaqtarynda taıfýn soǵýy múmkin, dep habarlady jeksenbide Japonııanyń ulttyq meteorologııalyq agenttigi.

Agenttiktiń málimetinshe, jeksenbi kúni tústen keıin Nepartak taıfýny soltústikke saǵatyna 15 shaqyrym jyldamdyqpen, Tokıodan ońtústik-shyǵysqa qaraı 1 800 km jyldamdyqpen qozǵalady. Taıfýnnyń ortasyndaǵy atmosferalyq qysym 994 gektopaskaldy qurady, al jeldiń jyldamdyǵy saǵatyna 108 shaqyrymǵa jetti. Taıfýn Japonııa astanasyna bıiktigi úsh qabatty úıdeı tolqyndar men nóser jaýyn ákelýi múmkin.

Taıfýn saldarynan týyndaıtyn oqys oqıǵalardy boldyrmaý úshin Olımpıada oıyndaryndaǵy akademııalyq esý keıinge qaldyryldy.

Seısenbide jel saǵatyna 126 shaqyrymǵa deıin soǵýy múmkin, al Tokıony qosa alǵanda, Kanto-Koshın aımaǵynda seısenbi kúni tańerteń 24 saǵat ishinde 150 mıllımetrge deıin jańbyr jaýady dep kútilýde.