Tokıoǵa baratyn sportshylar 7 aıda 15 retke deıin dopıng-test tapsyrǵan

NUR-SULTAN. QazAqparat – Qazaqstan atynan Toqkıodaǵy Olımpıada oıyndaryna qatysatyn sportshylar jyl basynan beri keminde 14 retten dopıng-test tapsyrǵan, dep habarlaıdy QazAqparat.

Bul týraly Ulttyq Olımpıada komıtetiniń bas hatshysy Andreı Krıýkov aıtty.

«Dopıng máselesi óte ózekti. Álem boıynsha búginde keń aýqymda kúres júrip jatyr. Tipti pandemııa kezinde de sportshylardy testileý protsesi toqtaǵan joq. Bizdiń ulttyq dopıngke qarsy ortalyǵymyzdyń mamandary da, halyqaralyq federatsııalardyń dopıng ofıtserleri de arnaıy shyǵyp, testileý ótkizip otyrdy. Biz de dopıngke tózim bolmaıtynyn málimdep júrmiz. Dopıng týraly jańa zań dopıng rejımin buzýshylardy eleýli sharalarǵa tap keltiredi. Dopıngpen baılanysty kez kelgen zań buzý áreketi qatań jazalanatynyn aıtý kerek», -dedi komıtettiń bas hatshysy.

Onyń aıtýynsha, qazaqstandyq sportshylar jyl basynan beri halyqaralyq dopıng-ofıtserlerdiń jiti nazarynda bolǵan.

«Atletterdiń árqaısysynda jeke testileý jospary bar. Testileý ashyq bolýy úshin, túrli aıla-sharǵylardy boldyrmaý úshin tekserýdi eki uıym ǵana jasaıdy. ITA halyqaralyq uıymy men ózimizdiń Ulttyq dopıngke qarsy ortalyq júrgizedi. Halyqaralyq uıym jeti aıdyń ishinde sportshylardy 10-12 retten tekserdi. ıAǵnı, bul mindetti protsedýra. Odan jaltarýǵa bolmaıdy. Sportshylar ózderiniń ornalasqan jerin aıtyp otyrýy kerek, testileý aıaq astynan, eshbir eskertýsiz júrgiziledi. Sondyqtan qandaı da bir áreket jasaý qıyn. Ózimizdiń dopıngke qarsy ortalyqtyń mamandary ár sportshyny 2-4 retke deıin testileýden ótkizdi. Biz óz tarapymyzdan barlyq aldyn alý jáne baqylaý sharalaryn atqaryp otyrmyz», - dedi Andreı Krıýkov.