Tokıoǵa attanǵaly otyrǵan Bekzat Nurdáýletovke Mańǵystaý oblysynyń ákimi sáttilik tiledi

AQTAÝ. QazAqparat - Mańǵystaý oblysynyń ákimi Serikbaı Trumov Tokıoda ótetin jazǵy Olımpıada oıyndarynda bokstan qazaq eliniń namysyn qorǵaıtyn Bekzad Nurdáýletov pen onyń bapkeri Marat Jákıevty qabyldady, dep habarlaıdy QazAqparat tilshisi.

23 shilde men 8 tamyz aralyǵynda Japonııada ótetin olımpıadada B.Nurdaýletov 81 keli salmaqta judyryqtasady.

Aımaq basshysy álem kóz tikken sporttyq dodada mańǵystaýlyq bylǵary qolǵap sheberiniń juldyzy janatynyna senim bildirip, sáttilik tiledi. Bekzadty baptaǵan Marat Jákıevke alǵysyn jetkizdi.

«Búkil qazaq eli sizderge jeńiske jetý jolynda kúsh-qaırat pen erik-jiger, qaısar sporttyq rýh tileıdi! Táýelsizdigimizdiń 30 jyldyǵy aıasynda mıllıondaǵan jankúıerdiń júregine Otanǵa, elge, jerge degen maqtanysh sezimin uıalatyp, kók baıraǵymyzdy kókke kóteretinderińizge kámil senemiz! Týǵan eldiń dańqyn asyryp, jańa bıikterdi baǵyndyrýlaryńyzǵa shyn júrekten tilektespiz. Aq jol, sát sapar tileımiz!» dedi S.Trumov.

B.Nurdáýletovtiń jeke bapkeri Marat Jákıev - Qazaqstannyń eńbek sińirgen jattyqtyrýshy. Búginde «Astana Arlans» komandasynyń bas bapkeri bolyp qyzmet etedi. Ol osyǵan deıin álem chempıony atanǵan Erdos Jańabergenov, Olımpıada oıyndarynyń eki dúrkin kúmis júldegeri Ádilbek Nııazymbetov syndy oǵylandardy úlken sharshy alańdarǵa shyǵaryp, juldyzyn jaqqan jattyqtyrýshy.

Aıta keter bolsaq, Tokıodaǵy Olımpıada oıyndary 23 shilde men 8 tamyz aralyǵynda ótedi.