Tokıoda ystyq aýa raıy qıyndyq týǵyzdy – paralımpıada júldegeri
«Qurmetti sportsúıer qaýym, keshe ǵana Tokıo Paralımpıadasy aıaqtaldy. Paralımpıada sportshylary atynan sizderge shyn júrekten rızashylyǵymdy bildiremin. Bizdiń bul júldelerimiz – memleket tarapynan jáne qazaq halqynyń sportshylarǵa kórsetip kele jatqan qoldaýynyń kórinisi. Qazaqstan Táýelsizdiginiń 30 jyldyǵyna oraı kók baıraǵymyzdy sport arenasynyń bıiginde jelbiretip, Tokıo tórinde ánuranymyzdy shyrqattyq. Alda áli talaı jeńisti sátterimiz bolady», - dedi ol.
Sonymen birge, sportshy jarys kezinde nelikten altyn medal ala almaǵanyn túsindirdi.
«Alǵashqy kúni ýaqyt jaǵy jáne ystyq aýa raıy azdap qıyndyq týǵyzdy. Sebebi bizdiń elmen salystyrǵanda 5-6 gradýsqa ystyq boldy. Jalpy daıyndyǵymyz jaqsy ótti. Psıhologııalyq turǵyda da daıyn boldyq. Tokıoda óz jerimizde júrgendeı sezindik. Altynǵa jete almaǵanyma ózim kinálimin. Asyǵyp, qatelik jiberip qoıdym. Qarsylasty sharshatyp, ýaqyt sozýym kerek edi. Sonda jeńis meniki bolatyn edi», - dedi Temirjan Dáýlet.
Sportshy memleket tarapynan alǵan qarajatyn óz qajetine jumsaıtynyn aıtty.
«Ózimniń jumystarym, qaryzdarym bar. Qarajatty ózime jaratamyn», - dedi sportshy.
Aıta keteıik, Paralımpıada oıyndarynda Qazaqstan 5 medal aldy. Onyń bireýi - altyn, úsheýi - kúmis, bireýi - qola medal.
Jalpy komandalyq esepte qazaqstandyq sportshylar 51-orynǵa taban tiredi.
Búgin Prezıdent Qasym-Jomart Toqaevtyń Jarlyǵymen Davıd Degtıarev III dárejeli «Barys» ordenimen, Zarına Baıbatına, Temirjan Dáýlet, Ánýar Sarıevter «Parasat» ordenimen, Nurdáýlet Jumaǵalı «Qurmet» ordenimen marapattaldy.
Qyrymbek Kósherbaev is-shara barysynda altyn medal alǵan Davıd Degtıarevke 106 mıllıon teńge, kúmis medalge ıe bolǵan Zarına Baıbatına, Temirjan Dáýlet, Ánýar Sarıevterge 63 mıllıon teńge, qola júldeger atanǵan Nurdáýlet Jumaǵalıge 31 mıllıon teńge qarjylaı syıaqy tabystady.