Tokıoda Qazaqstan Táýelsizdigine oraı 28 shaqyrymdyq jaıaý sherý ótti
Qazaqstan Elshiligi uıymdastyrǵan aktsııaǵa Japonııanyń Syrtqy ister mınıstrligi men Ekonomıka, saýda jáne ındýstrııa mınıstrliginiń, Ortalyq Azııa men Kavkaz elderin zertteý ınstıtýtynyń, Jańa energetıkalyq jáne ónerkásiptik tehnologııalardy damytý jónindegi uıymnyń, Munaı, gaz jáne metall boıynsha japondyq ulttyq korporatsııasynyń, «Toyota Tsusho» jáne «Mitsui Mining» kompanııalarynyń, «SCAT» áýe kompanııasy ókildiginiń qyzmetkerleri qatysty. Іs-shara barysynda japondyq dostar tek jaıaý sherýge ǵana qatysyp qoımaı, Qazaqstannyń memlekettik ánuranyn qazaq tilinde oryndap, qazaqstandyqtarǵa shynaıy qurmetin bildirdi. Sherý qatysýshylary arasynda Japonııada jumys isteıtin Qazaqstan azamattary men stýdentteri, sondaı-aq Kúnshyǵys elinde turatyn qandastarymyz boldy.
QR-nyń Japonııadaǵy Elshisi Erlan Baýdarbek-Qojataev shara eldiń ártúrli óńirinde turyp jatqan qazaqstandyqtar úshin demalys kúni Tokıoda kezdesýge jáne shet elde Táýelsizdik kúnin osyndaı belsendi túrde atap ótýge jaqsy sebep bolatyndyǵyn atap ótti.
Al Japonııa ekonomıka, saýda jáne ındýstrııa mınıstrligi avıatsııalyq komponentter men materıaldar departamentiniń dırektory Takaıýkı Nııkýra bul sherýge qýana qatysqanyn aıtyp, qazaqstandyqtardy Tuńǵysh Prezıdent kúnimen jáne Táýelsizdik kúnimen quttyqtady.
Japonııa SІM-niń Eýropa isteri jónindegi bıýrosy Ortalyq Azııa jáne Kavkaz elderi boıynsha basqarmasynyń qyzmetkeri Kotomı Tada Qazaqstan-Japonııa aktsııasynda áriptesterimen birge júrip, úlken qýanysh pen qýat alǵanyn aıtty.
Sherý qatysýshylary «Haneda» halyqaralyq áýejaıy aýdanyndaǵy «Honhaneda» parkinen júrýdi bastap, tokıolyq Fýchý aýdanynda shamamen 5,30 saǵattan keıin márege jetti. Jaıaý sherý baǵdary japondyqtar úshin qasıetti Fýdzııama taýyn tamashalaýǵa bolatyn Tama ózeniniń jaǵalaýynda ótti. Bul jol japondyqtardyń serýendeý, júgirý jáne velosıped tebý úshin ýaqyt ótkizýdiń súıikti orny sanalady.
Qazaqstannyń Japonııadaǵy Elshiligi saıtyndaǵy aqparatqa sáıkes, jaıaý sherý Tokıoda ekinshi ret ótkizilip otyr. Ótken jyly Elshilik qyzmetkerleri Iokogamadan Tokıoǵa 27 shaqyrymdyq sherý jasaǵan edi.