Tokıoda AQSh pen Ulybrıtanııadan kelgen 4 olımpıada qyzmetkeri qamaýǵa alyndy

TOKIO. Kyodo-QazAqparat - Polıtsııa Tokıo Olımpıadasyna jumys isteý úshin AQSh pen Ulybrıtanııadan kelgen tórt elektrık kokaın qoldandy degen kúdikpen qamaýǵa alynǵanyn málimdedi, dep habarlaıdy QazAqparat Kyodo agenttigine silteme jasap.

Eki brıtandyq jáne eki amerıkalyq Japonııaǵa aqpan-mamyr aılary aralyǵynda Tokıo oıyndary ótetin oryndardaǵy elektr generatorlaryna tehnıkalyq qyzmet kórsetý úshin kelgen.

Polıtsııanyń habarlaýynsha, 2 shildede tórteýi de keshki saǵat 20.00-den bastap el astanasyndaǵy Roppongı aýdany ortalyǵyndaǵy barda ishimdik ishken. Odan shyqqannan keıin, kúdiktilerdiń biri ruqsatsyz jaqyn mańdaǵy páterge kirgen.

Tártip saqshylarynyń sózine qaraǵanda, tórteýine júrgizilgen esirtki synaǵy kokaın qoldanýdy anyqtady.

Seısenbide ótken baspasóz máslıhatynda Olımpıada mınıstri Tamaıo Marýkava: «eger olardyń qylmysy rastalsa, bul oıyndar ımıdjine nuqsan keltiretin oqıǵa. Bul shynymen de ókinishti»,- dep atap ótti.

Kúdikke ilingenderdiń tórteýi de Tokıoda ornalasqan Aggreko Events Services Japan, sheteldik elektr generatorlar fırmasynyń jergilikti enshiles kásipornynyń qyzmetkerleri.

Kompanııa bulardyń qyzmetinen bosatylǵanyn habaarlady.

Oıyndardy uıymdastyrýshylar Aggreko Events Services Japan kompanııasyna aldaǵy ýaqytta mundaı keleńsiz jaǵdaılardy boldyrmaýdy eskertti.