Tokıo Olımpıadasynyń jeńimpazdaryna memlekettik nagradalar tabystaldy

NUR-SULTAN. QazAqparat – QR Memlekettik hatshysy Qyrymbek Kósherbaev Tokıo-2020 Olımpıadasynyń jeńimpazdaryn jeńisimen quttyqtap, QR Prezıdenti Qasym-Jomart Toqaevtyń atynan birqatar memlekettik nagradalardy tabys etti, dep habarlaıdy QazAqparat tilshisi.

«Ardaqty áleýmet, bıylǵy Olımpıada sport tarıhyndaǵy aıryqsha báseke bolǵany anyq. Búkil álem alapat indetpen kúresip jatqanda jarysty uıymdastyrý ońaıǵa soqqan joq. Sportshylardyń saıysqa daıyndyǵy da birshama ózgerdi. Olımpıada ýaqyty 1 jylǵa keıinge shegerildi. Osyndaı syndarly sátte synǵa túsken sizderdiń erik-jigerlerińizdi erekshe atap ótken jón. Olımpıadanyń birinshi kúni Eldos Smetov alǵashqy júldeni qorjynǵa salsa, jarystyń sońyna qaraı Sofıa Berýltseva ulttyq quramnyń Tokıodaǵy joryǵyn túıindedi. Aýyr atletterimiz Igor Son men Zýlfııa Chınshanlo, boksshylarymyz Sáken Bıbosynov pen Qamshybek Qońqabaev, balýan Nurıslam Sanaev pen karatıst Darhan Asadilov jankúıerlerdi júldemen qýantty. Sizder memlekettiń namysy men abyroı, mereıi men mártebesin synǵa túsken jahandyq jarysta jan aıap qalǵan joqsyzdar. Qansha jyldyq eńbekpen kelgen júldelerińiz qutty bolsyn», - dedi Qyrymbek Kósherbaev saltanatty sharada.

Aıtýly sharaǵa, Memlekettik hatshydan bólek QR Prezıdenti Ákimshiligi basshysynyń birinshi orynbasary Dáýren Abaev, QR Premer-Mınıstriniń orynbasary Eraly Toǵjanov jáne QR Mádenıet jáne sport mınıstri Aqtoty Raıymqulova qatysty.

Memlekettik nagradamen qatar, jeńimpaz sportshylar men olardyń jattyqtyrýshylaryna qarjylaı syıaqy tabystaldy. Atap aıtqanda, Olımpıada júldegerlerine 31 mln teńge, al jattyqtyrýshylarǵa 25 mln teńge kóleminde syıaqy taǵaıyndaldy.

Aıta ketsek, buǵan deıin Memleket basshysynyń Qazaqstan Respýblıkasynyń memlekettik nagradalarymen nagradtaý týraly Jarlyǵynyń shyqqany habarlanǵan bolatyn.