Tokıo Olımpıadasynyń shegerilýi: Qazaqstanda 4,3 mlrd teńge únemdeldi

NUR-SULTAN. QazAqparat – Mádenıet jáne sport mınıstri Aqtoty Raıymqulova Tokıo Olımpıadasyna shegerilýine baılanysty Qazaqstanda osy jartyjyldyqta 4,3 mlrd teńge únemdelip, bıýdjetke qaıtarylǵanyn málimdedi, dep habarlaıdy QazAqparat tilshisi.

«Pandemııaǵa baılanysty búkil álemde iri sporttyq sharalardyń bári de keıinge shegerildi. Ózderińiz biletindeı, Olımpıada oıyndary da kelesi jylǵa qaldyryldy. Jazǵy Olımpıada oıyndary osy jyldyń shilde aıynyń aıaǵy men tamyz aıynyń basynda ótýi tıis bolatyn. Osyǵan baılanysty halyqaralyq jáne lıtsenzııalyq saıystardyń ótkizilý kestesine de aıtarlyqtaı ózgerister engizildi», - dedi Aqtoty Raıymqulova OKQ alańy arqyly halyq aldynda esep berý kezdesýinde.

Mınıstr qazirgi ýaqytta qazaqstandyq sportshylar óz jattyǵýlaryna kiriskendigin aıtyp ótti.

«Alaıda Olımpıada kelesi jylǵa qaldyrylǵannan keıin bıylǵy jartyjyldyqta 4,3 mlrd teńge únemdelip, memlekettik bıýdjetke qaıtaryldy», - dedi Aqtoty Raıymqulova.