Tokıo Olımpıadasynyń basshysy oıyndardyń ótkizilmeý múmkindigin joqqa shyǵardy

TOKIO. Kyodo News- QazAqparat – Juma kúni Tokıo Olımpıadasy oıyndaryn uıymdastyrý komıtetiniń basshysy Seıko Hasımoto Japonııa astanasy men eldiń ózge jerlerinde koronavırýs juqtyrǵandar sanynyń kúrt óskenine qaramastan oıyndardyń ótkiziletetinin málimdedi, dep habarlaıdy QazAqparat Kyodo News agenttigine silteme jasap.

«Men oıyndardy ótkizbeý týraly oılaǵan joqpyn. Biz qaýipsizdik boıynsha sharalardy qabyldap, Olımpıada oıyndaryn ótkizýdi kózdep otyrmyz», - dedi Hashımoto baspasóz máslıhatynda.

Japonııada COVID-19 vırýsyn juqtyrýdyń táýliktik kórsetkishi qaıta ósip keledi. Bul rette densaýlyq saqtaý salasynyń sarapshylary koronavırýstyń jańa nusqalarynyń paıda bolýynan týyndaǵan ınfektsııalardyń «tórtinshi tolqyny» eldiń medıtsına salasyna odan da úlken júkteme salyp otyrǵanyn eske salyp otyr.

Japonııa úkimeti men basqa uıymdastyrý organdary qazirdiń ózinde Tokıodaǵy Olımpıada jáne Paralımpıada oıyndaryn kórermenniń qatysýynsyz ótkizý sheshimin qabyldady.

Olımpıada oıyndarynyń ashylý saltanatyna deıin 100 kúnnen az ýqyt qaldy, al Japonııada oıyndardy pandemııa jaǵdaıynda ótkizý boıynsha qoǵamdyq qoldaý tómen bolyp otyr: Kyodo News-tiń taıaýda júrgizgen saýalnamasynda respondentterdiń 39,2 paıyzy oıyndardy ótkizbeý kerek ekenin aıtsa, taǵy 32,8 paıyzy olardy keıinge qaldyrý kerek degen pikir qaldyrǵan.

Hashımoto oıyndardyń sátti ótýi komıtettiń sportshylar men kórermenderdiń qaýipsizdigin qamtamasyz etýine baılanysty ekenin atap ótti.