Tokıo Olımpıadasynyń alaý estafetasy qashan ótetini anyqtaldy

NUR-SULTAN. QazAqparat - Tokıo Olımpıadasynyń alaý estafetasy 2021 jyldyń 25 naýryzynda Fýkýsıma prefektýrasynda bastalady jáne 121 kúnge sozylady. Bul týraly Tokıodaǵy Olımpıada jáne Paralımpıada oıyndaryn uıymdastyrý komıtetine silteme jasap olympic.kz saıty habarlaıdy.

Olımpıada alaýynyń estafetasy Fýkýsımadaǵy fýtbol ortalyǵynda bastalyp, keıin Japonııanyń 47 prefektýrasynda bolady.

«Tokıo -2020» uıymdastyrý komıteti koronavırýs indetine baılanysty qaýipsizdik talaptaryn kúsheıtedi dep kútilýde. Odan bólek, uıymdastyrýshylar Olımpıada alaýy estafetasyn meıilinshe jeńil ótkizýdiń joldaryn qarastyryp jatyr.

Eske salaıyq, XXXII Jazǵy Olımpıada oıyndary Japonııada 2020 jyldyń jazynda ótýi tıis bolatyn. COVID-19 pandemııasyna baılanysty Oıyndar keıinge shegerildi. Soǵan qaramastan, Olımpıadanyń «2020» jazýy sol kúıi saqtalyp qaldy.

Halyqaralyq olımpıada komıteti belgilegen Tokıo Olımpıadasynyń jańa datasy – 2021 jyldyń 23 shildesi men 8 tamyzy aralyǵy.

Uıymdastyrýshylardyń aıtýynsha, bul – buryn-sońdy bolmaǵan eń ınnovatsıalyq Olımpıada bolady. Onda 33 sport túrinen 339 medal jıyntyǵy sarapqa salynady. Olımpıada-2020-ǵa jańadan bes sport túri endi. Olar: beısbol/softbol, karate, serfıng, sporttyq quzǵa órmeleý jáne skeıtbordıng.

Aıta keteıik, QR Mádenıet jáne sport mınıstrligi elimizde Tokıo Olımpıadasyna irikteý týrnırleri qashan bastalatynyn málim etken edi.