Tokıo Olımpıadasynda sheteldik delegatsııalar sany eki eseden astam qysqartylady

TOKIO.Kyodo – QazAqparat – Japonııa úkimeti Tokıo qalasynda ótetin Olımpıada jáne Paralımpıadaǵy sheteldik delegatsııalardyń sanyn bastapqydaǵy josparmen salystyrǵanda eki eseden artyq qysqartýǵa nıetti. Endi jarystarǵa qatysatyn delegatsııalardaǵy adamdar sany sportshylardy sanamaǵanda 78 myńdy quraıdy. Bul týraly QazAqparat Kyodo agenttigine silteme jasap habarlaıdy.

Byltyr Oıyndardyń ýaqytyn ózgertý týraly sheshim qabyldanǵanǵa deıin buǵan qatysatyn delegatsııalardaǵy adamdar sany 180 myń bolatyny shamalanǵan.

Keshe agenttik, sondaı-aq Japonııa úkimeti Tokıo Olımpıadasynda sheteldik kóshbasshylar men mınıstrlerdiń óz elderiniń sportshylarymen kezdesýge tyıym salýdy kózdep otyrǵandyǵyn málimdedi. Bul sharalar koronavırýs taralýynyń aldyn alý maqsatynda engiziledi. Budan bólek, Oıyndardyń uıymdastyrýshylary eger jarysqa qatysýshy eldiń prezıdenti kelse, resmı delegatsııalardyń sanyn 12 adamǵa deıin, al mınıstri keletin bolsa, onymen birge júretinderdi bes adamǵa deıin qysqartpaq.

Sheteldik memleket basshylyǵynyń ókilderine Japonııada maksımaldy túrde az ýaqyt bolý, qoǵamdyq kólikti paıdalanbaý jáne Tokıo qalasynyń syrtyna shyqpaý eskertiletin bolady.