Tokıo Olımpıadasynda Qazaqstan Týyn kimder ustap shyǵady

NUR-SULTAN. QazAqparat – Jeńil atletıkadan London Olımpıadasynyń chempıony, jazǵy Olımpıadanyń júldeler jıyntyǵynyń tolyq ıegeri Olga Rypakova jáne bokstan ulttyq quramanyń kapıtany, álem chempıonatynyń eki dúrkin júldegeri Qamshybek Qońqabaev Tokıoda Qazaqstan Olımpıada quramasynyń Tý ustaýshylary retinde tańdaldy. Bul týraly búgin Ulttyq Olımpıada komıtetinen málim etti, dep habarlaıdy QazAqparat.

Tý ustaýshylardy Qazaqstan Ulttyq Olımpıada komıtetiniń Atletter komıssııasy usynǵan.

«Tarıhı Tokıo Olımpıadasynyń bastalýyna bir aıdan az ýaqyt qaldy. Saǵyna kútken Olımpıada oıyndary ótedi jáne de oǵan Qazaqstan maqtanyshpen óziniń eń úzdik sportshylaryn attandyrady. Eń laıyqtylary irikteldi. Men Olga Rypakovanyń Olımpıadanyń ashylý saltanatynda Qazaqstan Týyn alyp shyǵatynyna qýanyshtymyn. Sebebi, Olganyń arqasynda kók baıraǵymyz Olımpıada kóginde bir emes, birneshe ret jelbiredi. Qamshybek Qońqabaev – qazaqstandyq sporttyń kúshi men sheberliginiń úlgisi, Olımpıada sharshy alańynda zor jaýapkershilikke ıe bolǵan boks quramasynyń kapıtany. Eki sportshy da qatarlastarynyń aldy, quramanyń kóshbasshylary jáne jas býynǵa úlgi. Qos atletke jáne barlyq olımpıadalyq quramǵa sáttilik tileımin», - dedi Qazaqstan UOK basshysy Tımýr Qulybaev.

Olga Rypakova úshin Tokıodaǵy jarys onyń sport mansabyndaǵy tórtinshi Olımpıada bolmaq. Ol úsh qarǵyp sekirý boıynsha 2008 jyly Beıjiń Olımpıadasynda kúmis, 2012 jyly Londonda altyn jáne 2016 jyly Rıoda qola medal jeńip aldy.

Budan bólek, Olganyń enshisinde Ýnıversıada «altyny» jáne Azııa oıyndarynyń 6 altyn medali bar. Sondaı-aq, ol álem chempıony jáne 2010 jylǵy qurlyqtyq kýbogtiń ıegeri.

«Olımpıada oıyndaryndaǵy Qazaqstanǵa tıesili 16 «altynynyń» úsheýin áıelder jeńip aldy. Jyldan-jylǵa sporttaǵy áıelder sany artyp, olar jańa rekordtar ornatady dep senemin. Olımpıada oıyndarynyń ashylý saltanatynda elimizdiń týy senip tapsyrylǵany keremet áser, sezimge bóleıdi. Dál osy mıssııanyń maǵan usynylǵanyna jáne senip tapsyrylǵanyna qýanyshtymyn«, - deıdi Olga Rypakova.

Qamshybek Qońqabaev - bokstan Qazaqstan erler ulttyq quramasynyń kapıtany. Ol 2014 jyly áskerıler arasynda ótken álem chempıonatynyń jeńimpazy. Azııa chempıonatynyń eki dúrkin jeńimpazy jáne 2017 men 2019 jylǵy álem chempıonattarynyń kúmis júldegeri. Tokıo Olımpıadasy 29 jastaǵy qyzylordalyq sportshy úshin alǵashqy Olımpıada oıyndary bolmaq.

»Tokıodaǵy Olımpıada oıyndarynyń ashylý saltanatynda týdy ustap shyǵýdy maǵan senip tapsyrǵany úshin Qazaqstan men elimizdiń sport qoǵamyna alǵys bildirgim keledi. Bul men úshin úlken jaýapkershilik jáne úlken mártebe«, - dedi Qamshybek Qońqabaev.

Olımpıada oıyndarynyń ashylý saltanaty 23 maýsymda Tokıo Olımpıada stadıonynda ótedi. Olımpıadalyq komanda Tokıoǵa jiberilgenge deıin jattyǵý bazalarynda kem degende eki apta karantınde bolady. Komanda Japonııaǵa 16 shildede attanady. Qaýipsizdik pen densaýlyqty qorǵaýdy qamtamasyz etý úshin delegatsııanyń reısteri «Air Astana» áýekompanııasynyń charterlik reısterimen júzege asyrylady.

Buǵan deıin habarlaǵanymyzdaı, qazir Olımpıadaǵa Qazaqstannan 95 sportshy baratyny belgili. Degenmen, sportshylardyń sońǵy ári naqty tizimi 5 shildeden keıin anyq bolady. Sebebi UOK keıbir sport túrlerinen halyqaralyq federatsııalardyń lıtsenzııalardy qaıta bólý, úlestirý nátıjelerin kútýde.