Tokıo Olımpıadasyna Qazaqstannan qansha sportshy qatysady

NUR-SULTAN. QazAqparat - 2021 jyly Japonııada ótetin Tokıo Olımpıada oıyndarynda Qazaqstan namysyn 110-nan astam sportshy qorǵaıdy dep kútilýde. Bul týraly Ortalyq kommýnıkatsııalar qyzmeti alańynda ótken brıfıngide QR Mádenıet jáne sport vıtse-mınıstri Sáken Musaıbekov aıtty, dep habarlaıdy QazAqparat tilshisi.

«Qazirgi ýaqytta bizdiń komandamyzdyń qorjynynda Tokıo oıyndarynyń 42 lıtsenzııasy bar. Ózderińiz bilesizder, Olımpıada oıyndary 2021 jylǵa aýystyryldy jáne 23 shilde men 5 tamyz aralyǵynda ótedi. Elimizdiń tarıhynda alǵash ret júzýden Dmıtrıı Balandın syndy Olımpıada chempıony shyqty ári ol lıtsenzııa alyp úlgerdi. Sońǵy 20 jylda alǵash ret sadaq atýdan komandalyq saıysqa qatysamyz. Sporttyń komandalyq túrinen vaterpolshylarymyz da lıtsenzııa aldy», - dedi ol.

Vıtse-mınıstrdiń atap ótýinshe, qazirgi ýaqytta Olımpıadaǵa barýǵa úmittenetin sportshylarymyzdyń barlyǵy qyzý daıyndyqqa kirisip ketken. Olarǵa 1 maýsymnan bastap qaýipsizdiktiń barlyq sharalaryn saqtaı otyryp, jattyǵýǵa ruqsat berilgen.

«Josparlaǵanymyzdaı 100-den astam lıtsenzııa utyp alamyz. Olımpıada oıyndaryna 110-nan astam sportshymyz qatysady. Biz qyz-jigitterimizdiń, komandamyzdyń tabysty óner kórsetetinine senimdimiz», - dedi Sáken Musaıbekov.