Tokıo Olımpıadasy Qazaqstannyń sporttaǵy júıeli problemalaryn ashyp berdi - Erlan Saırov
«Tokıodaǵy Olımpıada oıyndary Qazaqstannyń sport salasyndaǵy júıeli problemalardy ashyp berdi. Osyǵan baılanysty, Prezıdent Qasym-Jomart Toqaev elimizdiń sport salasynyń damýyna óziniń alańdaýshylyǵyn bildirdi. Bizdiń sport salasynda qarama-qaıshylyqtar óte kóp! Keıbir sport obektilerine aǵyl-tegil qarjy bólingen. Mysaly, Shýchınskidegi taýly shańǵy tramplıni nysanyna 38 mlrd teńge jumsalǵan. Al sporttyq nátıje joq. 2021 jyly joǵary jetistik sportyna 47 mlrd teńgeden astam bólinse, buqaralyq sporttyń damýyna bar joǵy 2 mlrd teńge bólingen. Balalar men jasóspirimder mektepteri men jattyqtyrýshylarynyń materıaldyq-tehnıkalyq múshkil jaǵdaıy, el ishinde jasóspirimder arasynda jarystardyń bolmaýy, balalar men jastar sportyn qoldaýdyń júıesiniń joqtyǵy sport jetisteriniń basty tejegishi», - dedi E. Saırov.
Onyń paıymynsha, sport federatsııasyna basshy bolǵan olıgarhtar sportty damytýǵa emes, bıýdjet qarjysyn ıgerýge áýes. Nur-Otan Fraktsııasy sport salasyn túbegeıli reformalaý qajet dep esepteıdi. Qazaqstannyń sport salasy elimizdiń ishki adamı kapıtalyn paıdalanýǵa jáne damytýǵa baǵyttalýy tıis.
«Aýyl-aımaqtarda balalardyń jappaı sportpen aınalysýyna jaǵdaı jasaý kerek, ol úshin mektebi bar barlyq aýyldarda zaman talabyna saı sport zaldaryn salý mańyzdy. Aýyl-aýdan deńgeıinde bala-jasóspirim sport mektepterin qalypqa keltirip, olardyń oqý-jattyǵý ádisterin modernızatsııa jasaý qajet. Óńirlik ákimshilikter oblystyq buqaralyq sport jarystaryn kóptep uıymdastyryp, jas jetkinshekterge jol ashatyn jaǵdaı jasaýlary kerek. Qazaqstanda salynǵan iri sport keshenderinde balalar men jasóspirimderge baǵa óte qymbat bolǵandyqtan dene shynyqtyrý, sportpen shuǵyldana almaıdy. Qarapaıym halyqqa, ásirese balalarǵa bul keshenderdiń esigi «tars jabylǵan». Osy máseleni shuǵyl sheshý mindet!», - dedi depýtat.
«Jattyqtyrýshylardyń kásibı deńgeıin arttyra otyryp, ártúrli ozyq halyqaralyq mekteptermen tájirıbe almasýdy jolǵa qoıý mańyzdy. Shette, basqa elderdiń medal qorjynyn toltyryp júrgen ulttyq jattyqtyrýshylardy elge qaıtarý - basty mindet. Barlyq únemdelgen qarjy Olımpıadalyq sport Federatsııalarynyń materıaldyq-tehnıkalyq bazasyn jetildirýge, jattyqtyrýshylardyń moraldyq, professıonaldyq, materıaldyq deńgeıin kóterýge, óz elimizdiń jas sportshylaryn tárbıeleýge baǵyttalýy tıis», - dedi ol.