Tokıo Olımpıadasy: Qazaqstan sportshylarynyń formasy osy aıda daıyn bolady

NUR-SULTAN. QazAqparat – QR Mádenıet jáne sport vıtse-mınıstri Erlan Qojaǵapanov qazaqstandyq sportshylar Tokıo Olımpıadasynda qandaı forma kıedi degen suraqqa jaýap berdi, dep habarlaıdy QazAqparat tilshisi.

«Bul másele Ulttyq Olımpıada komıtetiniń baqylaýynda. Meniń bilýimshe, osy aıdyń sońyna deıin bul formany kóre alamyz. Kıimdi ulttyq kompanııa tigedi, keıbir elementter jańa ınnovatsııalyq ádistermen sheshilip jatyr. Biz ár Olımpıadada formamyzǵa ózgerister engizemiz, Tokıo Olımpıadasyndaǵy ulttyq quramamyzdyń formasy Rıoǵa qaraǵanda ádemirek bolatynyna senemin», - dedi Erlan Qojaǵapanov Ortalyq kommýnıkatsııalar qyzmetinde ótken baspasóz máslıhatynda tilshi suraǵyna.

Buǵan deıin Mádenıet jáne sport vıtse-mınıstri Tokıodaǵy Olımpıadaǵa baratyn sportshylardyń qandaı vaktsına saldyrǵanyn aıtyp bergen edi.