Tokıo-2020: Sáken Bıbosynovtyń kelesi qarsylasy kim

TOKIO. QazAqparat - Tokıo Olımpıadasynda qazaqstandyq Sáken Bıbosynovtyń (52 keli) jartylaı fınalda kimmen kezdesetin belgili boldy, dep habarlaıdy QazAqparat tilshisi.

Eske salsaq, búgin shırek fınalda qazaqstandyq sportshy ıspanııalyq Gabrıel Eskobardan 3:2 esebimen basym tústi. Endi onyń jartylaı fınaldaǵy qarsylasy - ulybrıtanııalyq Galal ıAfaı.

Ol 1992 jyly 11 jeltoqsanda dúnıege kelgen. Budan buryn dúnıejúzilik deńgeıde jetistikke jete qoıǵan joq.

Galal ıAfaı búgin shırek fınalda álem chempıonatynyń úsh márte júldegeri atanǵan kýbalyq boksshy Iosvanı Veıtııany 4:1 esebimen qapy qaldyryp ketti. Odan buryn armenııalyq Korıýn Solomonıandy, odan keıin zambııalyq Patrık Chınembany jeńdi.

Jartylaı fınal 5 tamyz kúni ótkiziledi.

Eske salsaq, bıylǵy Olımpıadaǵa bokstan erler quramasynan 8 sportshy bardy. Sákennen ózge budan buryn jartylaı fınalǵa Qamshybek Qońqabaev (91 keliden joǵary) shyqqan bolatyn. Búgin taǵy bir qazaqstandyq Zakır Safıýllın (63 keli) shırek fınal oıynyn ótkizedi.