Tokıo-2020: Olımpıadanyń bastalýyna týra bir jyl qaldy
2020 jyldyń 24 shildesi men 9 tamyzy aralyǵynda Japonııa astanasy Tokıo HHHІІ Jazǵy Olımpıada oıyndaryn qabyldaıdy. Búgingi tańda tórtjyldyqtyń basty dodasyna kúnshyǵys eli qyzý daıyndyq júrgizip jatyr.
Ashylý saltanatynan buryn, ıaǵnı 2020 jyldyń 22 shildesinde fýtbol men softboldan irikteý syny bastalady. Sondaı-aq, ashylý saltanaty ótetin kúni eskek esý men sadaq atý sportynyń ókilderi jarys jolyna shyǵady. 2020 jylǵy Tokıo Olımpıadasynyń birinshi jarys kúninde sporttyń 21 túrinen jarystar ótedi. Onyń ishinde ústel tennısi, tennıs, dzıýdo, badmınton, gımnastıka, tennıs pen velosport bar.
Tokıo-2020 oıyndarynyń baǵdarlamasyna qosylǵan 3x3 basketbol, skeıtbordıng pen serfıng alǵashqy demalysta bastalyp, búkil oıyn barysynda el nazaryna usynylady.
2020 jyldyń 1 tamyzynda Olımpıada oıyndaryna alǵash ret engen sport túrlerinen kóptegen júlde óz ıesin tappaq. Atap aıtar bolsaq, dzıýdodan komandalyq jarys, trıatlonnan aralas komandalyq estafeta jáne aralas komandalyq atýdan medaldar jıyntyǵy sarapqa salynady. Bul kúni sporttyń 23 túrinen jarys ótedi.
Tokıo-2020 Olımpıadasynyń eń sońǵy jarys kúninde erler arasyndaǵy marafon bastalady. Álemdegi úzdik alty marafon qataryna enetin jyl saıynǵy Tokıo marafony endi mıllıondaǵan kórermenniń nazaryn aýdarmaq.
Tokıo-2020 Olımpıadasynda 42 sport nysany jumys isteıdi. Búginge deıin 24 nysan jumys istep tur, 10 ýaqytsha nysan jáne 8 jańa nysan salynady.