Tokıo-2020: Meırambek Aınaǵulov qyrǵyz balýanyna ese jiberdi

TOKIO. QazAqparat - Tokıo Olımpıadasynda grek-rım kúresinen Meırambek Aınaǵulov alǵashqy kezdesýde qarsylasyna ese jiberdi, dep habarlaıdy QazAqparat tilshisi.

Qazaqstandyq sportshy 60 kelide qyrǵyzstandyq Jolaman Sharshenbekovpen sheberlik baıqasty. Qarsylasy da osal emes. 2018 jyly álem chempıonatynda kúmis júldeger atanǵan. Al Meırambek 2017 jáne 2019 jyldarda álem chempıonatynda eki medal alyp qaıtqan bolatyn.

Búgingi beldesýde qyrǵyz balýany myqtylyǵyn tanytty. Ol Meırambekten 8:0 esebimen basym tústi. Nátıjesinde shırek fınalǵa joldama aldy.

Aıta keteıik, Olımpıadada endi grek-rım kúresinen Demeý Jadyraev (77 keli) pen Nursultan Tursynov (87 keli) el namysyn qorǵaıdy.

Eske salsaq, búgin bokstan Qamshybek Qońqabaev (91 keliden joǵary) pen Ábilhan Amanqul (75 keli) sharshy alańǵa shyǵady.

Foto: Jeńis Ysqabaı, Qazaqstan UOK