Tokıo-2020: búgingi nátıje kóńilden shyqty - Denıs Gankın

NUR-SULTAN. QazAqparat - Tokıo Olımpıadasynyń alǵashqy jarys kúninde sadaq atýdan irikteý kezeńi aıaqtaldy. Erler arasyndaǵy synda Qazaqstan komandasy óner kórsetip, Denıs Gankın alǵashqy ondyqqa endi, dep habarlaıdy QazAqparat Olympic.kz-ke silteme jasap.

Denıs Gankın 669 upaı jınap, 64 sportshynyń ishinen 9-shy oryn ıelendi. Ilfat Abdýllın 27-shi, Sanjar Musaev 52-shi satyda.

Іrikteý kezeńiniń qorytyndysy boıynsha Ońtústik Koreıa ókili Kım Dje Dok kósh bastady. Ekinshi orynda amerıkalyq Bredı Elıson, úshinshi satyda koreıalyq On Djın Hek ornalasqan.

«Búgingi nátıjem kóńilimnen shyǵady. Tek jarys sońyna qaraı jeldiń kúsheıgeni azdaǵan kedergi keltirdi. Áıtpese, qalǵanynyń bári oıdaǵydaı. Bapkerlerim tehnıkalyq turǵydan qatelespeýdi tapsyrǵan bolatyn. Eldegi tynymsyz daıyndyqtyń kómegi kóp boldy. Jalpy alǵanda, bizdiń komanda úshin búgingi kórsetkish jaman emes. Sanjar men Ilfat ta jaqsy óner kórsetti. Olarǵa da jel kedergi keltirse kerek. Óıtkeni, jeldiń baǵyty túsiniksiz. Endi 26 shilde kúni komandalyq jarysty bastap, medalǵa talasamyz», - dedi Denıs Olympic.kz tilshisine bergen suhbatynda.

Aıta ketelik, irikteý kezeńiniń qorytyndysy boıynsha kelesi aınalymdaǵy sparrıngtik juptar anyqtalady. Qazaqstandyq Ilfat Abdýllın Ulybrıtanııa ókili Djeıms Výdgeıtke qarsy shyǵady. Denıs Gankın Egıpet namysyn qorǵaıtyn ıÝsýf Tolbamen ózara myqtyny anyqtaıdy. Sanjar Musaev qytaılyq Dapeng Vangpen 1/16 fınal joldamasyna talasady.

Komandalyq synda Qazaqstan Úndistan quramasymen kezdesedi.