Toqaev Jetisý oblysynyń áleýmettik-ekonomıkalyq damý barysymen tanysty
Jetisý oblysynyń ákimi Beıbit Isabaevtyń aıtýynsha, aımaq ekonomıkasynyń barlyq negizgi salasynyń damýynda oń úrdis saqtalyp otyr.
Óńir ákimi Memleket basshysyna aımaq ekonomıkasynyń barlyq negizgi salasynyń damýynda oń úrdis saqtalyp otyrǵanyn aıtty. Oblystaǵy óndiris kólemi 5,8 paıyzǵa, aýyl sharýashylyǵy 1,7 paıyzǵa ulǵaıǵan.
Al saýda men qurylys salalarynyń damý kórsetkishteri 1,6 ese ósti. 198,4 myń sharshy metr turǵyn úı paıdalanýǵa berilgen.
Bul 2022 jyldyń osy kezeńimen salystyrǵanda 11,2 paıyzǵa kóp. Oblys ekonomıkasyna 213,9 mıllıard teńge ınvestıtsııa tartylǵan, sonyń ishinde jeke ınvestıtsııalar 15,7 paıyzǵa kóbeıdi.
Beıbit Isabaev oblystyń ónerkásip óndirisinde 533 kásiporyn jumys isteıtinin, onda 26,6 myń adam eńbek etip jatqanyn jetkizdi. Onyń aıtýynsha, óndiris kólemi 230,1 mıllıard teńgeni qurady. Bıyl jalpy quny 46,9 mıllıard teńge bolatyn 14 nysandy iske qosý josparlanǵan.
Aýyl sharýashylyǵynyń jalpy ónimi 1,7 paıyzǵa ósken. Onyń ishinde egin alqaby 1,9 myń gektarǵa ulǵaıǵan, al qant qyzylshasyn ósiretin jer kólemi 2 ese artyp, 8,7 myń gektarǵa jetken.
Sonymen qatar oblys ákimi Memleket basshysynyń tapsyrmasyna sáıkes Aqsý qant zaýytyna tolyq jóndeý júrgizilip, iske qosylǵany týraly aıtty.
Kóksý qant zaýyty 70 myń tonna qant óndirgen. Búginde eki qant zaýyty 280 sharýashylyqtan 205 myń tonnadan astam shıkizat qabyldaǵan. Onyń 56 myń tonnasy óńdelip, 7 myń tonna qant alynǵan.
Oblysta sý júıesin qaıta jańartý jáne salý úshin 22 jobanyń iske asyrylyp jatqany týraly baıandaldy. Al 22 eldi meken, sonyń ishinde Taldyqorǵan qalasyna gaz qubyry tartylyp, 288 myń adam kógildir otynmen qamtylǵan. Bıyl 20 eldi mekende qurylys-montajdaý jumystary júrgizilip jatyr.
Oblys ákimi áleýmettik nysandar salý máselesine arnaıy toqtaldy. 2023-2025 jyldary 8,8 myń oryndyq 16 jańa mektep salý josparlanǵan, sonyń ishinde 6600 oryndyq 7 oqý ordasy «Jaıly mektep» ulttyq jobasy aıasynda salynady jáne 1800 oryndyq 2 mekteptiń qurylysy bıyl bastalǵan.
Densaýlyq saqtaý salasy boıynsha 8 nysannyń qurylysy júrgizilip jatyr. Jergilikti bıýdjet esebinen 21 blokty-modýldi keshen salynǵan.
«Aýyldyq densaýlyq saqtaýdy jańǵyrtý» ulttyq jobasy aıasynda 2025 jylǵa deıin taǵy 59 nysan salý josparlanǵan. Al mádenıet salasynda 5 nysannyń qurylysy júrgizilip, taǵy 8 nysan kúrdeli jóndeýden ótkizilip jatyr.
Memleket basshysyna bıyl oblysta 14 sport nysany salynyp jatqany jóninde aıtyldy. Sonymen birge jergilikti bıýdjet esebinen 3 blokty-modýldy keshen salynady.
Al demeýshiler esebinen Taldyqorǵan qalasynda jyl boıy jumys isteıtin «Jetysu Arena» jabyq sport kesheni iske qosylǵan. Bul keshenge 867 mıllıon teńge ınvestıtsııa salynǵan.
Jetisý oblysyndaǵy avtomobıl joldarynyń jalpy uzyndyǵy – 3 988 shaqyrym. Bıyl oblystyq mańyzy bar 221 shaqyrym jol men 73 eldi mekendegi 249 shaqyrym aýylishilik joldardy salý jáne qaıta jańartý jumystary júrgizilýde.
Qasym-Jomart Toqaev oblystyń damý qarqynyn oń baǵalap, osy baǵyttaǵy jumystardy odan ári jalǵastyrýdy tapsyrdy.