Toqaev: Jer qoınaýyn ıgerý múmkindigi tynysh kabınetterde sheshilmeýi kerek

NUR-SULTAN. QazAqparat – Jer qoınaýyna qoljetimdilik máselesin tynysh kabınetterde sheshý áreketi zańnan tys áreket bolyp sanalýy kerek. QR Prezıdenti Qasym-Jomart Toqaev Qazaqstan halqyna kezekti Joldaýynda osyndaı pikir bildirdi, dep habarlaıdy QazAqparat tilshisi.

«Ásirese geologııalyq barlaý jáne jer qoınaýyn keshendi zertteý salasyna serpin kerek. Ult jospary aıasyndaǵy Geologııalyq aqparattardyń ashyq bazasyn qurý reformasy logıkalyq túıinine jetkizilýi tıis. Ol bazanyń ınvestorlarǵa qoljetimdiligi qamtamasyz etilsin. Jer qoınaýy – bul ulttyq ıgilik. Oǵan qoljetimdilik máselesin kýlýarlyq talqylaýlar arqyly tynysh kabınetterde sheshý zańnan tys áreketke jatqyzylýy kerek. Tıisti organdar osy másele boıynsha baqylaýdy qamtamasyz etedi», - dedi Prezıdent óz Joldaýynda.

Sonymen birge, ol budan bylaı memleket bankırlerge kómektespeıtinin eskertti.

«Strestik aktıvterdi azaıtý jónindegi jumystardyń mańyzy zor. Biz sheshim qabyldadyq: memleket bankırlerge kómektespeýi kerek. Onymen birge buǵattalǵan aktıvterdi ekonomıkalyq aınalymǵa qaıtarý mańyzdy. Biraq ol tek qana naryqtyq negizde júrýi kerek. Ol úshin zańnamalyq baza qajet. Úkimet Qarjy naryǵyn retteý jáne damytý agenttigimen birge jyl aıaǵyna deıin Parlamentke zań jobasyn usynýy tıis», - dedi Memleket basshysy.