Toqaev jastarǵa: Abaıdyń «Paıda oılama, ar oıla» deıtin ósıetin únemi este ustaý kerek

NUR-SULTAN. QazAqparat - Uly Abaıdyń «Paıda oılama, ar oıla. Talap qyl artyq bilýge» deıtin ósıetin únemi este ustaý kerek. Bul týraly búgin Jastar jylynyń jabylý jáne Volonter jylynyń ashylý saltanatynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Urpaǵyn aıalaı bilgen halyq irgeli jurtqa aınalatyndyǵy belgili. Biz halqymyzdy álemge tanytqan eń asyl qasıetterdi sizderdiń boılaryńyzdan kórgimiz keledi. Uly Abaıdyń «Paıda oılama, ar oıla. Talap qyl artyq bilýge» deıtin ósıetin únemi este ustaý kerek», - dedi Qasym-Jomart Toqaev.

Memleket basshysy Jastar jylynda óskeleń urpaqty qoldaý úshin kóptegen jumys atqarylǵanyn aıtty.

«Osy mańyzdy jyl aıasyndaǵy jobalardy iske asyrý kezinde dańǵazalyqtan bas tartyp, naqty ispen aınalystyq. Memlekettik organdar birneshe mańyzdy baǵyt boıynsha jumys júrgizdi», - dedi QR Prezıdenti.