Toqaev úıler arasyna keńse salýǵa ruqsat bergen sheneýnikter jaýapqa tartylatynyn aıtty

ASTANA. QazAqparat – Prezıdent Qasym-Jomart Toqaev áleýmettik nysan, saıabaq jáne oıyn alańynyń ornyna záýlik keńseler salýǵa ruqsat berip jatqan laýazym ıeleri jemqorlyqqa baılanysty jaýapqa tartylatynyn málim etti, dep habarlaıdy QazAqparat.

«Taǵy bir másele bar. Qalanyń kelbetin buzyp turǵan ala-qula jarnamalar óte kóp. Onyń bári talapqa saı bolýy kerek.

Sondaı-aq qalada orynsyz qurylys jumystary kóbeıip ketti, ıaǵnı úılerdiń arasyna ǵımarat salyna beretin boldy. Bul ásirese, «Myńjyldyq» alleıasynda, Saraıshyq, Syǵanaq, Turan, Beısekov kóshelerinde qatty baıqalady.
Turǵyndarǵa áleýmettik nysan, saıabaq nemese oıyn alańy salynady dep ýáde beriledi. Alaıda, ol jerde ıin tiresken ǵımarattar paıda bolady. Mysaly, «Olımp palas-2» turǵyn úıiniń aýlasyndaǵy oıyn alańynyń ornyna záýlim keńse salynǵan.
Mundaı qurylysty birjola doǵarý kerek. Áıtpese, sheshim qabyldaǵan tıisti laýazym ıeleri jemqorlyqqa baılanysty jaýapqa tartylady. Sebebi osyndaı sheshimderdiń astarynda qurylys kompanııalarynyń ákimdikte jumys isteıtin adamdarmen birge azamattarymyzdyń yqylasyna qarsy qabyldaǵan áreketteri jatyr», - dedi Q.Toqaev.