Toqaev: Urpaqtyń boıynda jaman ádet bolsa, bul aldymen úlkenderdiń kinási

ASTANA. QazAqparat – Qazir jas urpaq áleýmettik jeli arqyly tárbıe alyp jatyr. Balany durys baǵytqa buryp, jol kórsetip otyrmasaq, bul – óte qaýipti úrdis. Bul týraly Túrkistanda ótip jatqan Ulttyq quryltaıda Prezıdent Qasym-Jomart Toqaev málim etti, tapsyrma berdi, dep habarlaıdy QazAqparat tilshisi.

«Óskeleń urpaqtyń tárbıesi – óte mańyzdy másele. Biz ulttyq biregeıligimizdi nyǵaıtýymyz qajet. Jalpy, dúnıejúzindegi ár ult – biregeı. Muny durys túsinýimiz kerek. Tabysqa jetý úshin josparymyz qol jetpes qııalǵa ne bolmasa jalań sózge emes, naqty iske negizdelýi kerek. Sonda ǵana onyń bári jurtqa túsinikti, anyq bolady. ıAǵnı, «Qaıtsek tabysty elge aınalamyz?» degen suraqtyń jaýaby aıqyn bolýǵa tıis», - dedi Memleket basshysy.

Prezıdent atap ótkendeı, ulttyń jańa bolmysy bilim, ǵylym jáne mádenıet salasyn damytý arqyly qalyptaspaq.

«Adal azamatqa tán qasıetter árbir jastyń boıynan tabylýy kerek. Ulttyń jańa bolmysy bilim, ǵylym jáne mádenıet salasyn damytý arqyly qalyptasady. Osy úsh baǵytty rýhanı damý salasyndaǵy jumystyń myzǵymas úshtaǵany deýge bolady. Biz urpaq tárbıesine basa mán berip, jastardy jaqsylyqqa jeteleýimiz kerek. Búgingi ınternet dáýirinde bul ońaı sharýa emes.

Ashyǵyn aıtsaq, qazir jas urpaq áleýmettik jeli arqyly tárbıe alyp jatyr. Balany durys baǵytqa buryp, jol kórsetip otyrmasaq, bul – óte qaýipti úrdis. Ǵalamtor arqyly jat dinı aǵymdardyń quryǵyna túsken jastar da bar. Urpaqtyń boıynda jaman ádet bolsa, bul – eń aldymen, úlkenderdiń kinási. Biz jastardy jahandanýdyń qaterli yqpalynan barynsha saqtaýǵa mindettimiz», - dep másele kóterdi Prezıdent.

Eske sala keteıik, búgin Túrkistanda Memleket basshysynyń qatysýymen Ulttyq quryltaıdyń ekinshi otyrysy ótip jatyr.