Toqaev TMD Parlamentaralyq Assambleıasynyń otyrysynda «Rýhanı jańǵyrý» týraly aıtty

SANKT-PETERBÝRG. QazAqparat - Sankt-Peterbýrgte TMD Parlamentaralyq Assambleıasynyń 47-shi plenarlyq otyrysy ótti. Onyń taqyryby Dostastyq elderi mádenıetiniń ózara is-qımylyna,  jaı-kúıine, keleshegi men quqyqtyq qamtamasyz etýine, sondaı-aq TMD-daǵy Mádenıet jylyna arnalǵan, dep habarlaıdy «QazAqparat» HAA tilshisi.

Qazaqstan delegatsııasyn Parlament Senatynyń tóraǵasy Qasym-Jomart Toqaev bastap bardy.

Senat spıkeri TMD Parlamentaralyq Assambleıasynyń otyrysynda sóz sóıleı otyryp, TMD memleketteriniń mádenı yqpaldastyǵy turǵyndar ómiriniń sapasyn arttyrýdaǵy mańyzdy másele - gýmanıtarlyq damý mindetterin iske asyrýdyń kepili ekendigin jáne halyqtardyń rýhanı erekshelikterin saqtaýdaǵy ózekti máselelerdiń sheshimi bolýy tıis ekenin atap ótti. 
 

«Mádenıetterdi ózara baıytýdyń qajettigi týraly qazaq halqynyń uly aqyny Abaıdyń «Basqa halyqtyń tili men mádenıetin bilý, adamdy sol halyqpen teń etedi» degen bolatyn. TMD-ǵa qatysýshy memleketterdiń búgin qaralyp otyrǵan Mádenıet týraly kodeksiniń jobasy bizdiń memleketterimizdiń qatynastaryn úılestirýge jáne yntymaqtastyǵyn keńeıtý úshin quqyqtyq sharttaryn qamtamasyz etýge jáne birlesken mádenı jobalardy iske asyrýǵa  baǵyttalǵan», - dedi Q.Toqaev.
 

Senat tóraǵasy parlamentshilerdiń nazaryn Memleket basshysy N.Nazarbaevtyń ıdeologııalyq jańarýlardyń baǵdary naqty belgilengen «Rýhanı jańǵyrý» baǵdarlamasyna aýdardy. Q.Toqaev atap ótkendeı, osy baǵdarlama BUU-nyń barlyq tilinde usynylatyn bolady.
 

«Biz Qazaqstan ádebıetindegi, kınematografııasyndaǵy, dramatýrgııasyndaǵy eń úzdik shyǵarmalardyń búkil álemdegi, birinshi kezekte Eýrazııa keńistigindegi mıllıondaǵan adamdardyń júreginen oryn alǵanyn qalaımyz. Qazaqstan qoǵamyndaǵy rýhanı jańǵyrýdyń maqsaty TMD-ǵa qatysýshy memleketterdiń Mádenı yntymaqtastyq tujyrymdamasy mindetterimen úılesetinine senimdimin.

Qazaqstan mádenı-tarıhı muralar men eskertkishterdi týrıstik maqsatta birlese paıdalaný, mádenıet salasynyń shyǵarmashylyq áleýetin júzege asyrý úshin jaǵdaı jasaý, TMD keńistiginde mádenı shyǵarmalarǵa qol jetkizýdi qamtamasyz etý sekildi mádenıet salasyndaǵy ózara is-qımyldyń keleshegi zor dep sanaımyn», - dedi Q.Toqaev.

Q.Toqaevtyń pikirinshe, mádenıetterdiń únqatysýyn damytýǵa baǵyttalǵan birlesken jumystar, tarıhı muralardy saqtaý men kóptarapty shyǵarmashylyq jobalardy júzege asyrý jahandyq aýqymda da jalǵasýy yqtımal.

«ıÝNESKO-nyń shtab-páterinde TMD-daǵy mádenıet jylynyń birlesken tusaýkeserin ótkizý ony laıyqty ilgeriletý bolyp tabylar edi. Saıası qaıshylyqtar órship turǵan búgingi kúni jalpy adamzattyq qundylyqtar men murattardy ýaǵyzdaıtyn shynaıy mádenıet óziniń jasampaz, órkenıetti jáne bitimgershilik áleýetin aýqymdy halyqaralyq aýmaqta tolyqtaı júzege asyra alady», - dep atap ótti Senat tóraǵasy.