Toqaev Tájikstanmen yntymaqtastyq jóninde: Energetıka men mashına jasaýda áleýet zor
«Biz ózara saýdany odan ári kem degende 2 mıllıard dollarǵa deıin arttyrý úshin qajetti qosymsha qadamdar jasaýǵa kelistik. Taraptardyń naqty kúsh-jigerimen bul kórsetkishti kúsheıtýge bolady. Qazaqstandyq óndirýshiler qazirdiń ózinde Tájikstanǵa jalpy somasy 140 mln dollardan asatyn, 60 túrli taýardan turatyn eksportyn ulǵaıtýǵa daıyn. Bizdiń el Tájikstanǵa azyq-túlikten bastap temirjol komponentteri men jyljymaly quramdarǵa deıin taýarlardyń keń jelisin jetkizýdi arttyra alady.
«Kazakh Export» kompanııalary jelisi boıynsha keleshegi zor kelisimsharttar jasalýy múmkin. Bul jeliniń qyzmeti TMD elderinde keńinen suranysqa ıe. Tájik bıznesiniń de Qazaqstanǵa jetkizetin eksport kólemin ulǵaıtý úshin úlken rezervter bar ekenine senimdimin», - dedi Memleket basshysy.
Prezıdenttiń sózinshe, kelissóz kezinde 2023-2024 jyldarǵa arnalǵan taýar aınalymyn ulǵaıtý jónindegi jol kartasyn iske asyrý tetikteri de talqylanǵan.
«Úkimetterge osy baǵyttardyń bárin muqııat pysyqtaý tapsyryldy. Kelissózder barysynda biz ónerkásip kooperatsııasyn damytýda zor áleýetimiz bar ekenin atap óttik. Biz eki el ekonomıkasy ósiminiń jańa kózine aınalatyn birlesken jobalardy iske qosýǵa kelistik. Energetıka men mashına jasaýda ekijaqty ózara is-qımyldy tereńdetýde úlken múmkindikter bar», - dedi Qasym-Jomart Toqaev.
Aıta keteıik, keshe Qasym-Jomart Toqaev Qazaqstanǵa memlekettik saparmen kelgen Tájikstan Prezıdenti Emomalı Rahmondy elorda áýejaıynda qarsy alǵan bolatyn.
Al 3 mamyrda Qazaqstan-Tájikstan bıznes-forýmynda birqatar mańyzdy qujatqa qol qoıyldy.
Búgin qos eldiń basshylary shaǵyn quramdaǵy kelissóz ótkizdi. Óz kezeginde E.Rahmon Astanaǵa memlekettik saparmen kelýge shaqyrǵany jáne qazaq halqynyń dástúrli qonaqjaılyǵy úshin Qasym-Jomart Toqaevqa alǵys aıtty.