Toqaev shtabynyń ókilderi óńir-óńirlerde jastarmen kezdesti

NUR-SULTAN. QazAqparat - Prezıdenttikke kandıdat Qasym-Jomart Toqaevtyń shtabtary men senimdi ókilderi óńir-óńirlerde jastarmen kezdesti, dep habarlaıdy QazAqparat saılaýaldy shtabtyń baspasóz qyzmetine silteme jasap.

Eń aldymen Jambyl oblystyq qoǵamdyq shtabtyń músheleri Jandar Káribaıuly men Masat Berik aımaqtaǵy jastarmen kezdesti. Jıynǵa «Nur Otan» partııacy Jambyl aýdandyq fılıaly «Jas Otan» jastar qanatynyń belsendi músheleri, joǵary jáne arnaýly kásiptik oqý oryndarynda oqıtyn jastar men jumysshy jastar, úkimettik emes uıym músheleri qatysty.

Sondaı-aq, Almaty oblystyq qoǵamdyq shtabynyń músheleri Jansúgirov atyndaǵy Jetisý memlekettik ýnıversıtetinde jastarmen kezdesti. Munda jalpyulttyq #Birge aktsııasy aıasynda jastardyń usynystary tyńdaldy. Shtab jetekshisi Ǵalıasqar Sarybaev kandıdat Qasym-Jomart Kemelulynyń saılaýaldy baǵdarlamasyn jastarǵa túsindirdi.

Mundaı basqosý Panfılov aýdany Jarkent qalasyndaǵy aýdandyq mádenıet úıinde de ótti. Qazaqstan prezıdenttigine úmitker Qasym-Jomart Toqaevtyń aýdandyq qoǵamdyq shtabynyń ókilderi bıyl Prezıdent saılaýynda óz tańdaýyn alǵash ret jasaıyn dep otyrǵan jas saılaýshylarmen kezdesti. Shtab músheleri men «Jas Otan» JQ belsendileri úmitker Q. Toqaevtyń saılaýaldy baǵdarlamasyn keńinen tanystyrdy.

Al Petropavlda, qalalyq qoǵamdyq shtabtyń múshesi Arman Berdaǵulov «Nur Otan» partııasy fılıalynyń ǵımaratynda Soltústik Qazaqstan memlekettik ýnıversıteti men temirjol kolledjiniń stýdentterimen kezdesti. Jastar Qasym-Jomart Toqaevtyń saılaýaldy baǵdarlamasymen tanysyp, shtab múshelerine kókeıdegi suraqtaryn qoıdy.