Toqaev shtaby Atyraý halqyna saılaýaldy baǵdarlamany tanystyrdy
Búgin QR Prezıdenttigine kandıdat Qasym-Jomart Toqaevtyń Respýblıkalyq qoǵamdyq shtabynyń músheleri úgit-nasıhat jumystaryn Atyraý oblysynda jalǵastyrdy. Aldymen shtab músheleri óńirdegi bıýdjet salasynyń qyzmetkerlerimen jáne jergilikti belsendi azamattarmen kezdesti. Munda kandıdattyń saılaýaldy baǵdarlamasynyń basymdyqtary sóz boldy. Ásirese halyqtyń áleýmettik jaǵdaıyn jaqsartýǵa baǵyttalǵan naqty ustanymdarǵa erekshe nazar aýdaryldy.
Atyraýdyń munaıly ólke ekeni belgili. Sondyqtan shtab ókilderi atalǵan salaǵa qajetti iri kólemdi ónimder daıarlaıtyn «AtyraýNefteMash» zaýytynyń eńbek ujymymen arnaıy kezdesti. Munda olar baǵdarlamada eńbek adamdaryna laıyqty jaǵdaı jasaýdyń naqty tetikteri kórsetilgenin aıtty. Sondaı-aq kezdesýde eldiń turaqty damýy Elbasy saıasatynyń sabaqtastyǵymen tyǵyz baılanysty ekeni aıtyldy.
Sonymen qatar, úgit-nasıhat jumystary Mahambet aýdanynda da jalǵasty. Munda Q.Toqaevtyń senimdi ókilderi jergilikti jurtshylyqpen kezdesip, kandıdat anyqtaǵan basym baǵyttardyń bári eldik múddege negizdelgenin aıtty.
Osy rette shtab músheleri oblystaǵy birqatar kásiporyndardyń eńbek ujymdarymen kezdesip, úgit-nasıhat jumystaryn júrgizgenin de atap ótken jón.