Toqaev ShYU bastamasyn qoldaý úshin BUU Bas assambleıasy qararyn qabyldaýdy usyndy

<p>ASTANA. KAZINFORM — ShYU-nyń ádil álem, kelisim jáne damý bastamasyn qoldaý úshin BUU Bas assambleıasy qararyn qabyldaý qajet. Bul týraly elordadaǵy Táýelsizdik saraıynda Shanhaı yntymaqtastyq uıymy sammıti aıasynda ótip jatqan «ShYU+» kezdesýinde Memleket basshysy Qasym-Jomart Toqaev aıtty.</p>

«Sizderge ózara is-qımylymyzǵa jańa serpin berýge arnalǵan usynystardy usynýǵa ruqsat etińizder. Bizdiń oıymyzsha, basty mindet beıbit jáne úılesimdi damýdyń kún tártibin ujymdyq ilgeriletý bolyp qala beredi. Álemdegi negizgi qaıshylyqtardy ujymdyq kúsh-jiger men dana dıplomatııa arqyly ǵana sheshýge jáne turaqtylyqty qamtamasyz etýge bolatynyna senimdimin. Osy oraıda keler jyly óziniń 80 jyldyǵyn toılaıtyn BUU-ǵa úlken úmit artylady. Bul uıymǵa balama joq. Onyń áleýeti áli taýsylmaǵan. Bizdiń ortaq mindetimiz — HHІ ǵasyr syn-qaterlerine qarsy turýǵa qabiletti jahandyq qaýipsizdikti qamtamasyz etýdiń basty ınstıtýty retinde BUU rólin kúsheıtý», — dedi Prezıdent.

Memleket basshysy paıymynsha, ShYU-nyń úni qazirgi zamannyń ártúrli máseleleri boıynsha shoǵyrlandyrylǵan ustanymdy alǵa jyljyta otyryp, halyqaralyq arenada budan da kúshtirek estilýi kerek. 

«Sondyqtan biz qabyldaǵan tatý kórshilik, senim jáne seriktestik týraly málimdeme ózekti. Sonymen birge, BUU-nyń 80 jyldyǵyna jáne ShYU men BUU yntymaqtastyǵynyń 20 jyldyǵyna oraı ádil álem, kelisim jáne damý bastamamyzdy qoldaý úshin BUU Bas Assambleıasynyń qararyn qabyldaýdy usynamyn», — dedi Qasym-Jomart Toqaev.