Toqaev senatorlar nazaryn jastardyń bastamalaryn qoldaý qajettigine aýdardy
«Memleket basshysy jastardy muqııat tyńdap, olardyń usynystaryna qoldaý kórsetip, jigerine demeý berdi. Prezıdent óz sózinde jastarǵa qatysty máselelerdi jan-jaqty taldap, sheshý joldaryn kórsete otyryp, naqty keńesterin aıtty. Sonymen birge, jastarǵa sapaly bilim berý; jumyspen qamtý, turǵyn úımen qamtamasyz etý jáne otbasyn qurýǵa qajetti mańyzdy sharalardy júzege asyrý máseleleri boıynsha Úkimet pen ákimderge arnaıy jol kartasyn ázirleý tapsyryldy», - dedi Q.Toqaev.
Joǵarǵy Palata basshysy jastardyń bilimi men talaby, kúsh-qaıraty men otanshyldyǵy elimizdiń damýyna árqashan tyń serpinmen áser etetinin aıta kelip, jastardyń bul ıgi bastamalaryna árdaıym qoldaý kórsetýge Senat depýtattarynyń nazaryn aýdardy. Osyǵan baılanysty Q.Toqaev 7 aqpanda Senatta jastar saıasatyna arnalǵan dóńgelek ústel ótetinin, onda jastardy tolǵandyryp júrgen ózekti máseleler talqylanatynyn atap ótti.
Bıýro barysynda Palatanyń 31 qańtarda bolatyn kezekti otyrysynyń kún tártibi kelisildi.
Senatorlar Kaspıı teńiziniń quqyqtyq mártebesi týraly; 2014 jylǵy 29 mamyrdaǵy Eýrazııalyq ekonomıkalyq odaq týraly shartqa ózgeris engizý týraly hattamany; Eýrazııalyq ekonomıkalyq odaqtyń úshinshi memlekettermen, halyqaralyq uıymdarmen nemese halyqaralyq ıntegratsııalyq birlestiktermen halyqaralyq sharttary týraly kelisimdi; TMD-ǵa qatysýshy memleketterdiń terrorızmge jáne ekstremızmniń ózge de zorlyq-zombylyq kórinisterine qarsy kúresti júzege asyratyn quzyretti organdardy materıaldyq-tehnıkalyq qamtamasyz etýdegi yntymaqtastyǵy týraly kelisimdi ratıfıkatsııalaý týraly zań jobalaryn qaraıtyn boldy.
Bıýro otyrysynda Májilisten túsken zań jobalary Palata komıtetterine bólinip berildi.
Konstıtýtsııalyq zańnama, sot júıesi jáne quqyq qorǵaý organdary komıteti «Qazaqstan Respýblıkasynyń sot júıesi men sýdıalarynyń mártebesi týraly» Konstıtýtsııalyq zańǵa ózgerister men tolyqtyrýlar engizý týraly» konstıtýtsııalyq zań jobasy boıynsha bas komıtet bolyp belgilendi.
Ekonomıkalyq saıasat, ınnovatsııalyq damý jáne kásipkerlik komıteti «2010 jylǵy 9 jeltoqsandaǵy Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy Qazaqstan Respýblıkasyna munaı jáne munaı ónimderin jetkizý salasyndaǵy saýda-ekonomıkalyq yntymaqtastyq týraly kelisimge ózgerister engizý týraly hattamany ratıfıkatsııalaý týraly» zań jobasyn odan ári pysyqtaýmen aınalysatyn boldy.
Áleýmettik-mádenı damý jáne ǵylym komıteti «Qazaqstan Respýblıkasynyń keıbir zańnamalyq aktilerine balanyń quqyqtaryn qorǵaý jónindegi fýnktsııalardy júzege asyratyn uıymdardyń qyzmeti týraly ózgerister men tolyqtyrýlar engizý týraly» zań jobasy boıynsha bas komıtet bolyp belgilendi.
Eske sala ketsek, Elbasy Jarlyǵymen 2019 jyl Jastar jyly bolyp jarııalandy. 23 qańtarda Memleket basshysynyń qatysýymen Jastar jylynyń saltanatty ashylý rásimi ótti.