Toqaev polıtseılerden zańǵa baǵynatyn adamǵa qurmetpen qaraýdy talap etti

ASTANA. QazAqparat – Polıtsııa qyzmetkeri zańǵa baǵynatyn adamǵa qurmetpen qaraýy kerek. Bul týraly Memleket basshysy Qasym-Jomart Toqaev Іshki ister mınıstrliginiń alqa májilisinde osylaı aıtty, dep habarlaıdy QazAqparat Aqordaǵa silteme jasap.

«Jalpy zańǵa baǵyný men quqyq buzýshylyqtyń ara-jigin naqty ajyrata bilý qajet. Taǵy da qaıtalap aıtamyn. Qoǵamda Zań men Tártip qatań saqtalýy kerek. Sonda ǵana elimiz ósip-órkendeıdi. Bul – myzǵymas qaǵıda.

Qylmyskerlermen kúres ymyrasyz júrgizilýge tıis. Birde bir quqyq buzýshylyqty eleýsiz qaldyrýǵa bolmaıdy. Munda usaq-túıek degen joq», - dedi Prezıdent.

Q.Toqaev polıtsııa mamandary zańǵa baǵynatyn azamattarǵa qurmetpen qaraýy tıistigin atap ótti.

«Polıtsııa qyzmetkeri zańǵa baǵynatyn adamǵa qurmetpen qaraýy kerek. Al tártip buzýshylarmen zań aıasynda sóılesý qajet. Adamdy azaptaýǵa, qınaýǵa, tyıym salynǵan tergeý tásilderin qoldanýǵa múldem jol berilmeıdi. Árbir tártip saqshysy muny jete túsinýge tıis.

Kúndelikti jumysta osy talaptar saqtalsa, azamattardyń polıtsııaǵa degen senimi artady. Árıne, qoǵam tarapynan da qurmet bolýy kerek. Halyqtyń túsiniginde polıtsııa azamattardy qorǵaýshy, qoldaýshy, qylmystyń aldyn alýshy, zańnyń oryndalýyn qadaǵalaýshy bolýǵa tıis.

Ókinishke qaraı, qazir el arasynda polıtsııanyń kelbeti, bedeli dál sondaı dep aıta almaımyz. Tártip saqshysynyń zańdy talabyna baǵynbaý, oǵan qoqan-loqy kórsetý, tipti, kúsh qoldaný durys emes. Osyndaı áreketterdi doǵarý kerek. Mundaı jaǵdaıda buzaqylar jaýapsyz qalmaýy qajet», - dedi Memleket basshysy.