Toqaev pen Pashınıan keńeıtilgen quramda kelissóz júrgizdi

<p>EREVAN. KAZINFORM - Shaǵyn formatta ótken kezdesýden keıin Qazaqstan men Armenııa basshylary kelissózdi resmı delegatsııa músheleriniń qatysýymen jalǵastyrdy.</p>

Qasym-Jomart Toqaev Erevanǵa saparmen kelýge shaqyrǵany jáne qonaqjaılyq kórsetkeni úshin Nıkol Pashınıanǵa alǵys aıtty.

Sondaı-aq ol Qazaqstan Prezıdenti retinde Armenııaǵa alǵash ret resmı saparmen kelgenin atap ótti.

– Qazaq-armıan áriptestigin jańa deńgeıge kóterýge qatysty bastamańyzdy tolyq qoldaımyn. Biz armıan halqynyń tereń tarıhyna, ejelgi mádenıeti men salt-dástúrine zor qurmetpen qaraımyz, – dedi Memleket basshysy.

Qazaqstan Prezıdenti óziniń Armenııaǵa resmı sapary Dostyq pen yntymaqtastyq týraly shartqa qol qoıylǵanyna 25 jyl tolýyna oraı ótýiniń sımvoldyq máni bar ekenine nazar aýdardy.

Shırek ǵasyr ishinde ekijaqty qatynastardyń berik negizi qalandy. Saıası dıalog belsendi damyp, úkimetter men parlamentter arasynda baılanys ornady.

Sonymen qatar Memleket basshysy óziniń Erevanǵa sapary Qazaqstan men Armenııa arasyndaǵy yntymaqtastyqqa tyń serpin beredi dep sanaıdy.

Qasym-Jomart Toqaev ekijaqty yqpaldastyqty odan ári damytýdyń meılinshe perspektıvti baǵyttaryn aıqyndap berdi.

Onyń aıtýynsha, eń ózekti mindet – ekonomıkalyq qarym-qatynasty sapasy men mazmuny jaǵynan baıyta túsý. 

Ózara saýda-sattyqty ulǵaıtý úshin azyq-túlik sektorynda, ınvestıtsııa, kólik-logıstıka, IT-ındýstrııa jáne qurylys salalarynda aıtarlyqtaı rezerv bar. 

Nıkol Pashınıan Qazaqstan Prezıdentiniń Armenııaǵa alǵashqy sapary mol múmkindikterge jol ashatynyn atap ótti

– Sizdiń búgingi saparyńyzdyń mańyzy zor. Kelissóz barysynda keń aýqymdy máselelerdi qarastyrdyq. Sonyń ishinde ekonomıkalyq jáne saıası yntymaqtastyqty tereńdetýge, óńirlik yqpaldastyqty keńeıtýge basa mán berdik. Sonymen qatar biz mádenı-gýmanıtarlyq salany da nazardan tys qaldyrǵan joqpyz. Bıyl Qazaqstanda Armenııanyń mádenıet kúnderi, al kelesi jyly Armenııada Qazaqstannyń mádenıet kúnderi ótedi. Jalpy, búgingi qarastyrylatyn máseleler – aýqymdy jáne mazmundy. Sizdiń saparyńyzdyń nátıjesinde eki el arasyndaǵy yntymaqtastyqtyń barlyq baǵytyn damytýdy kózdeıtin naqty sheshimder qabyldaıtynymyzǵa senimdimin, – dedi Armenııa Premer-mınıstri.