Toqaev pen Makronnyń ortasyndaǵy qazaq qyzy týraly ne bilemiz
Sýrettegi qandasymyz – Esim Mahmutqyzy (Yeşim Savaş) - ótken ǵasyrdyń qyrqynshy jyldarynyń sońynda Qytaıdan bosyp, Túrkııaǵa jetken qazaqtardyń urpaǵy.
Ol 1991 jyly Parıjde dúnıege kelgen. Keıin ákesi Mahmut Savash jumys babymen otbasymen birge Frantsııanyń soltústigindegi Kreı qalasyna qonys aýdarady. Esim osy jerde ósip, 2020 jyly qala meriniń orynbasary bolyp saılanǵan.
«Shyǵys Qazaqstannyń Zaısan óńirinde dúnıege kelgen Zýqa batyr atamyzdyń shóberesi, Frantsııanyń Kreı qalasy ákiminiń orynbasary jıenimiz Esim Savash Mahmutqyzy Qazaqstan Prezıdenti Qasym-Jomart Toqaevtyń qurmetine Elıseı saraıynda Frantsııa prezıdenti Emmanıýel Makron atynan uıymdastyrylǵan memlekettik keshki qabyldaýǵa arnaıy shaqyrýmen qatysty. Shet elderdegi kúlli qazaq balasynyń maqtanyshy - táýelsiz Qazaqstan máńgi jasasyn!» - dep jazdy óziniń áleýmettik jelisinde Germanııada turatyn qandasymyz Ómirhan Altyn.
Esim bilimi boıynsha muǵalim jáne ekonomıst. 2012 jyldan bastap qoǵamdyq jumystarǵa belsendi aralasa bastaıdy. Keıin Kreı qalasy jastarynyń keńesine múshe bolyp qabyldanady. Buǵan deıingi suhbattarynda aıtqandaı, Kreı jastar keńesi qala boıynsha túrli jobany júzege asyrý úshin 15-21 jas aralyǵyndaǵy jastarǵa arnap forýmdar ótkizgen.
«2014 jyly mýnıtsıpıaldyq keńeske saılanǵan kezde men halyqaralyq qatynastarmen aınalystym. Aıta ketý kerek, Kreı qalasy álemniń 12 qalasymen tyǵyz baılanys ornatqan. Biz – Kreıdegi jalǵyz qazaq otbasymyz. Sondyqtan Qazaqstanmen baılanysymyzdy nyǵaıtsaq, jaqsy bolar edi. Men osyǵan deıin álemniń birqatar qalasymen, sonyń ishinde Túrkııanyń Kýshadasy qalasymen de baılanys ornattym. Qazaqstannyń bir qalasymen baılanys ornatsam, men úshin abyroı bolar edi», - degen edi bir suhbatynda.
Esim Savash 2023 jyly Astanada ótken «Otandastar» forýmyna qatysyp, sheteldegi qandastardyń máselesin kótergen bolatyn.
«Frantsııada shamamen 13 jyldan beri jumys istep kelemin. 2014 jyly men qalalyq basqarý organdarynda qyzmetke aralastym. Sodan keıin qala ákiminiń orynbasary bolyp saılandym. Bıyl Kreı qalasy jastarynyń máselesin jetkizý úshin bar kúshimdi saldym, endi ony Senatqa jetkizgim keledi. Jastar óz kózqarasyn jaqsy jaqqa ózgertip, saıasatqa aralasyp, álemniń damýyna úles qosýǵa múmkindigi bar. Qazaqstanda Eýropadaǵy qazaqstandyq jastar úshin jańa jobalar qolǵa alynǵanyn bilemin. Eýropadaǵy qandastardyń basty máselesiniń biri - keıbireýler óziniń qazaq ekenin dáleldeı almaıdy. Osyndaı másele kóp qazaqtyń basynda bar. Sondyqtan qazaqstandyq tarap bul problemany júıeli túrde sheshse eken», - dedi Esim Savash forýmda sóılegen sózinde.
Kreı qalasy (fr. Creil) - O-de-Frans aımaǵyna, Sanlıs okrýgine jatatyn, Frantsııanyń soltústigindegi qala.
Aıta ketsek Zýqa batyr Sábıtuly – HIH ǵasyrdyń sońy men HH ǵasyrdyń basynda el-jerimen bóten jurttyń bodandyq ezgisinde qalyp qoıǵan qazaqtardy aýmaly-tókpeli zamannyń alýan túrli apatynan qorǵaǵan tulǵa.
Zýqa batyr 1866 jyly Zaısannyń Kendirlik óńirinde bilimdi otbasynda dúnıege kelgen Onyń ákesi Shyǵys Qazaqstanda asa tanymal bolǵan Sábıt Damolla.