«Toqaev otstavkaǵa ketý sheshimin qabyldady» - aqparat feık

ASTANA. QazAqparat – TikTok áleýmettik jelisinde Prezıdent Qasym-Jomart Toqaev otstavkaǵa ketý sheshimin qabyldaǵany týraly vıdeo jarııalandy. Stopfake.kz saıtynyń jazýynsha, bul – feık.

«Resmı derekkózderde otstavka týraly aqparattar joq. Aqorda saıtynda da, Prezıdenttiń jeke Twitter-akkaýntynda da, onyń baspasóz qyzmetiniń akkaýntynda da bul týraly jazylmaǵan.
Shyndyqqa janaspaıtyn oqıǵalarǵa «aty aıǵaılap turǵan» taqyryptar qoıý – blogerler men keıbir buqaralyq aqparat quraldary óz jarııalanymdaryna nazar aýdartý úshin jıi paıdalanatyn ádis...

Sonymen qatar otstavkaǵa ketý týraly vıdeo jarııalanǵan TikTok jelisinde Qasym-Jomart Toqaevtyń resmı paraqshasy joq. Atalǵan áleýmettik jelide onyń atynan ashylǵan barlyq akkaýnttar – jalǵan», - dep jazady Stopfake.kz.

Aıta keteıik, Memleket basshysy Q.Toqaevtyń áleýmettik jelilerdegi resmı paraqshalaryna siltemeler Aqorda saıtynda kórsetilgen.